გერმანიის ყოფილი კანცლერი აცხადებს, რომ თანამდებობაზე ყოფნისას, ძლიერ ცდილობდა უკრაინაში ახლა არსებული ვითარების პრევენციას და საკუთარ თავს არ ადანაშაულებს იმაში, რომ ეს საკმარისად არ სცადა.
„ძალიან სამწუხაროა, რომ ეს არ გამოვიდა, მაგრამ საკუთარ თავს არ ვადანაშაულებ იმაში, რომ არ ვცადე“ - განაცხადა ანგელა მერკელმა, 2014 წლის მინისკის შეთანხმების თაობაზე.
მერკელი, რომელიც 2014 წელს, ყირიმის ანექსიის შემდეგ დასავლეთის მიერ რუსეთის წინააღმდეგ სანქციების დაწესებას ხელმძღვანელობდა, აცხადებს, რომ მინისკის შეთანხმებამ ვითარება დაამშვიდა და უკრაინას საშუალება მისცა გამხდარიყო ის, რაც დღეს არის.
„რა შეიძლებოდა მომხდარიყო, თუ 2014 წელს არავინ დაინტერესდებოდა და პუტინი უბრალოდ გააგრძელებდა? არც კი მინდა ამის ცოდნა“ - ამბობს ყოფილი კანცლერი.
მერკელი უკრაინის წინააღმდეგ რუსეთის ომს „საერთაშორისო სამართლის სასტიკ უგულვებელყოფას“ უწოდებს და ამბობს, რომ ამას გამართლება არ აქვს. ამასთან, მან ხაზი გაუსვა, რომ წინააღმდეგი იყო გეგმისა, რომლის მიხედვითაც უკრაინა ნატოში უნდა გაწევრიანებულიყო, რადგან, ერთის მხრივ, ამით რუსეთთან ესკალაციის თავიდან აცილება სურდა, მეორეს მხრივ კი უკრაინა მზად არ იყო.
„ეს არ იყო უკრინა, რომელსაც ჩვენ დღეს ვიცნობთ... ქვეყანა არ იყო სტაბილური, კორუფციით იყო გაჟღენთილი“ - თქვა მან.
