ოლგა ბორისოვა, რუსული საპროტესტო ჯგუფის "ფუსი რაიოტის" წევრი, საქართველოში არ შეუშვეს. ის საქართველოში უკვე ცხოვრობდა გარკვეული პერიოდის განმავლობაში. მას შემდეგ, რაც აქტივისტმა რუსეთი დატოვა, ის ჯერ თურქეთში, შემდეგ კი საქართველოში გადავიდა საცხოვრებლად.
ბორისოვამ საკუთარ ტვიტერ გვერდზე დაწერა, რომ გუშინ, 20 ივნისს, ყველანაირი ახსნა-განმარტებების გარეშე, საქართველოს საზღვარზე საზღვრის დაცვის პოლიციამ არ შეუშვა. ქალი კვლავ თურქეთში გააბრუნეს, საიდანაც ის თბილისში ბრუნდებოდა. ბორისოვა ამბობს, რომ ის საქართველოში ცხოვრობს და თბილისში ბინაც აქვს ნაყიდი.
ბორისოვა და "ფუსი რაიოტის" სხვა წევრები ღიად აპროტესტებდნენ რუსეთის მიერ ყირიმის ანექსიას 2014 წელს, ასევე რუსეთის მიერ უკრაინაში ხელახლა შეჭრას და ომის დაწყებას 2022 წელს.
ბოლო პერიოდში რამდენიმე რუსეთის მოქალაქეს საქართველოში შესვლაზე უარი უთხრეს. მათ შორის იყვნენ ალექსეი ნავალნის გუნდის წევრი, ლუბოვ სობოლი, რუსი ოპოზიციონერი დმიტრო გუდკოვი და რუსული დამოუკიდებელი მედიის, დოჟდის ჟურნალისტი, მიხეილ ფიშმანი.
ბორისოვას საქმეზე კომენტარი ქართველ ოფიციალურ პირებს ჯერ არ გაუკეთებიათ.
