საფრანგეთმა კოვიდ-19-ის პანდემიის მართვაში დრამატული ნაბიჯი გადადგა. ორშაბათიდან ამოქმედდა რეგულაცია, რომელიც სპეციალური კოვიდ-საშვის გარეშე, მცირე ზომის დახურულ სივრცეში შესვლასაც კრძალავს. ამ საშვის არქონის შემთხვევაში, ადამიანები ვერც თვითმფრინავით ან მატარებლით იმგზავრებენ და ვერც საყვარელ რესტორანში და კაფეში მოხვდებიან.
რეგულაცია ახლა უკვე მთელი ქვეყნის მასშტაბით მოქმედებს. ივლისში, რეგულაციის ნაწილობრივი შემოღებით, საფრანგეთის მთავრობამ კოვიდ-19-ზე ვაქცინაციაში დიდ წარმატებას მიაღწია. დღეისთვის, დაახლოებით, 36 მილიონი მოსახლეობის მქონე ქვეყანაში 54%-ზე მეტი ადამიანია სრულად იმუნიზებული. ხელისუფლება ცდილობს პანდემიის მორიგ ტალღას გაუმკლავდეს და ძალზე გადამდები კორონავირუსის დელტა ვარიანტის სწრაფად გავრცელების ფონზე, აღარ დაუშვას ჯანდაცვის სისტემის გადატვირთვა და სიკვდილობის ზრდა.
ასევე ნახეთ: საფრანგეთმა ვაქცინის პასპორტი დაამტკიცასაშვი (QR) კოდით, ერთგვარი ორგანზომილებიანი ბარკოდითაა დაშიფრული. ელექტრონულ დადასტურებას ამ კოდით იღებენ ისინი, ვინც კოვიდ-19-ზე აიცრა, ან აქვს დროის მოკლე ინტერვალში აღებულ ტესტზე უარყოფითი პასუხის დამადასტურებელი საბუთი. ახალი რეგულაცია საფრანგეთში ჩასულ ტურისტებზეც ვრცელდება. კოვიდ-საშვი საფრანგეთში ივლისში მხოლოდ მასობრივ ღონისძიებებზე მოქმედებდა, როგორიცაა სპორტული დარბაზები, კონცერტები, კინოთეატრები, კონფერენციები და ა.შ.
ჯარიმა პირველ შემთხვევაზე 135 ევროთია განსაზღვრული. საშვს საავადმყოფოებიც ითხოვენ და გამონაკლისს მხოლოდ სასწრაფო დახმარების საჭიროების მქონე პაციენტები შეადგენენ. ჯანდაცვის მუშაკებს კოვიდ-19-ზე იმუნიზაცია კანონით მოეთხოვებათ. მათ მთავრობამ აცრის საბოლოო ვადად 15 სექტემბერი დაუწესა.