რუსეთის პრეზიდენტმა ვლადიმერ პუტინმა ორშაბათს განაცხადა, რომ შეუძლებელია რუსეთის მოწყვეტა დანარჩენი მსოფლიოსგან და რომ დასავლეთის ქვეყნების მიერ დაწესებული სანქციები რუსეთის განვითარებას უკან ვერ შეატრიალებს.
ასევე ნახეთ: ვაშინგტონში ამერიკის ელჩის კრიტიკას პასუხობენ24 თებერვალს უკრაინაში ხელმეორე შეჭრის შემდეგ, დასავლეთის ქვეყნებმა რუსეთს ეკონომიკური, ფინანსური და პოლიტიკური სანქციები დაუწესეს, რომლებიც მიზნად ისახავს რუსეთის გლობალური ეკონომიკისგან იზოლირებას. სანქციების შედეგად, რუსეთს ჩამოართვა წვდომა ისეთ საქონელზე, როგორიცაა მაგალითად, კომერციული ელექტრონიკა, ნახევარგამტარები და თვითმფრინავის ნაწილები.
„არა მხოლოდ შეზღუდვები, არამედ უცხოურ მაღალტექნოლოგიურ პროდუქტებზე წვდომის თითქმის სრული აღკვეთა, განზრახ გამოიყენება ჩვენი ქვეყნის წინააღმდეგ“, - თქვა პუტინმა მთავრობის წარმომადგენლებთან ვიდეოკონფერენციაზე საუბრისას.
პუტინის თქმით, ეს "უზარმაზარი გამოწვევაა" და რუსეთი "არ აპირებს დანებებას". სანქციების გამო, მისი თქმით, რუსეთს მოუწევს საკუთარი შიდა ტექნოლოგიებისა და კომპანიების განვითარება.
მთავრობის შეხვედრაზე ფინანსთა მინისტრმა ანტონ სილუანოვმა განაცხადა, რომ რუსული ტექნოლოგიური სექტორის მხარდაჭერა დღეს კრემლის პრიორიტეტია, მაგრამ სახელმწიფოს მიერ გაღებულ თითოეულ რუბლს, მისი თქმით, უნდა ახლდეს მინიმუმ სამი რუბლი კერძო ინვესტორებისგან.