აშშ-ის სახელმწიფო დეპარტამენტის პრესმდივანმა მეთიუ მილერმა პრესკონფერენციაზე დასმული კითხვის პასუხად განაცხადა, რომ რუსეთმა უნდა დატოვოს საქართველო და შეწყვიტოს ქვეყნის ოკუპაცია.
"ვფიქრობ, ნათლად გამოვხატეთ სახელმწიფო მდივნის განცხადებაში ის, რასაც გარკვეული პერიოდის განმავლობაში ვაცხადებთ, რომ რუსეთი უნდა გავიდეს და შეწყვიტოს საქართველოს ოკუპაცია. ჩვენ გავაგრძელებთ ჩვენი ამ პოლიტიკის მხარდაჭერას“, - განაცხადა მეთიუ მილერმა.
მანვე აღნიშნა, რომ უკრაინაში შეჭრის საპასუხოდ რუსეთისთვის დაწესებული სანქციები მიმართულია მისი ძალის შესამცირებლად და ეს რუსეთისთვის არის თავისი ქმედებებისთვის დაკისრებული პასუხისმგებლობის ნაწილი.
ომთან დაკავშირებით, 7 აგვისტოს, განცხადება გაავრცელა ამერიკის სახელმწიფო მდივანმაც.
"15 წლის წინ რუსეთი შეიჭრა სუვერენულ სახელმწიფო საქართველოში და მისი ტერიტორიის 20%-ის ოკუპაცია მოახდინა. შეერთებული შტატები რჩება საერთაშორისოდ აღიარებულ საზღვრებში საქართველოს სუვერენიტეტისა და ტერიტორიული მთლიანობის მტკიცე მხარდამჭერად. რუსეთის ქმედებებმა სამუდამოდ შეცვალა იმ მოქალაქეეების ცხოვრება, ვისაც ეს კონფლიქტი შეეხო. უღრმესი პატივისცემითა და თანაგრძნობით ვიხსენებთ მათ, ვინც რუსულმა ძალებმა მოკლეს, დაჭრეს და გადაასახლეს", - ვკითხულობთ სახელმწიფო მდივნის, ენტონი ბლინკენის განცხადებაში.
სახელმწიფო დეპარტამენტის თანახმად, რუსეთის ქმედებები ამ ოკუპაციის დროს, მათ შორის კრემლის მავნებლური დეზინფორმაციული კამპანიები, ე.წ "ბორდერიზაცია" და მასობრივი გადააადგილება კვლავ იწვევს ენით აღუწერელ სიძნელეებს. დიპლომატიური უწყება განმარტავს, რომ როგორც უკრაინაში, ისე საქართველოში ხალხი იტანჯება რუსეთის მიერ საერთაშორისო კანონმდებლობის უგულებელყოფის და მეზობლებზე დომინირების სურვილის შედეგად.
"შეერთებული შტატები კვლავ მოწადინებულია, რომ რუსეთი ანგარიშვალდებული იყოს 2008 წელს მიღწეული ცეცხლის შეწყვეტის შესახებ 6-პუნქტიანი შეთანხმებით ნაკისრი ვალდებულებების წინაშე, რომ დაუბრუნოს საკუთარი ძალები კონფლიქტამდელ პოზიციებს და არ შეაფერხოს ჰუმანიტარული დახმარების მიწოდება. რუსეთმა უკან უნდა წაიღოს საქართველოს რეგიონების - აფხაზეთისა და სამხრეთ ოსეთის [ცხინვალის რეგიონის] ე.წ. დამოუკიდებელ სახელმწიფოებად აღიარება. ეს ქმედებები არის არსებითად მნიშვნელოვანი იმ ასობით ათასი იძულებით გადაადგილებული ადამიანისთვის, რომ ისინი საკუთარ სახლებში უსაფრთხოდ დაბრუნდნენ და ღირსეულად იცხოვრონ", - ამბობს სახელმწიფო მდივანი ენტონი ბლინკენი.
7 აგვისტოს 15 წელი შესრულდა რუსეთ-საქართველოს 2008 წლის აგვისტოს 5-დღიანი ომის დაწყებიდან. ამ დრომდე დევნილის სტატუსით ცხოვრობს ცხინვალის რეგიონიდან იძულებით გადაადგილებული 30 000-მდე ადამიანი. ომის შემდეგ საქართველომ კონტროლი დაკარგა ასზე მეტ ქართულ სოფელზე, რომელთა უმრავლესობა დღეს მიწასთან არის გასწორებული.
Facebook Forum