ამერიკის სურსათისა და მედიკამენტების ადმინისტრაციამ (FDA) კოვიდ-19-ის ბუსტერის 2 განახლებული ვერსია დაამტკიცა. ავტორიზაცია მიიღო „მოდერნას“ ვაქცინამ და „ფაიზერ-ბიონტექის“ ერთობლივმა ვაქცინამ. ბუსტერის ეს ახალი დოზა სპეციალურადაა შეცვლილი იმისთვის, რომ ყველაზე ეფექტურად ებრძოლოს ომიკრონის ახალ, ამჟამად ყველაზე გავრცელებულ ქვევარიანტებს - BA.4/BA.5-ს. შემდეგ ეტაპზე, საკითხს ადაავადებათა კონტროლისა და პრევენციის ცენტრი (CDC) განიხილავს. საბოლოო გადაწყვეტილებასაც ცენტრი მიიღებს.
განახლებულ სამიზნესთან ერთად, ორივე ეს ბუსტერი ასევე ეფექტურია ვირუსის სხვა ვარიანტების თუ ქვევარიანტების მიმართაც. FDA-მ კომპანია „მოდერნას“ ვაქცინის ამ დოზის გაკეთების ავტორიზება 18 წელზე უფროსი მოქალაქეებისთვის მისცა. „ფაიზერის“ ახალი ბუსტერის გაკეთება კი 12 წელზე ზემოთ ასაკის მოზარდებსა და ზრდასრულებს შეეძლებათ. მისი გამოყენება ნებადართულია სულ მცირე, ორი თვის მერე პირველადი ვაქცინების გაკეთებიდან, ან ბოლო ბუსტერ-დოზიდან.
ამერიკის მთავრობას უკვე დარეზერვებული აქვს „ფაიზერის“ განახლებული ვაქცინის 105 მილიონი დოზა და „მოდერნას“ 66 მილიონი დოზა. შეერთებული შტატები კორონავირუსის საწინააღმდეგო ვაქცინაციის კამპანიის გაძლიერებას შემოდგომიდან აპირებს. შემოდგომის დადგომასთან ერთად, საგანმანათლებლო დაწესებულებებში ახალი სასწავლო წელი იწყება. მოსწავლეთა და სტუდენტთა უმრავლესობა საკლასო ოთახებსა და აუდიტორიებში ბრუნდება. ამინდის ცვლილებასთან ერთად, უფრო მეტი ადამიანი იკრიბება დახურულ სივრცეშიც. ჯანდაცვის სპეციალისტები მოქალაქეებს კვლავ სიფრთხილისკენ მოუწოდებენ.
„ფაიზერი“ აცხადებს, რომ მას ვაქცინების ნაწილი უკვე მზად აქვს და 9 სექტემბრამდე 15 მილიონი დოზის ტრანსპორტირება იქნება შესაძლებელი.
საკვებისა და სურსათის ადმინისტრაციამ ივნისში ვაქცინის უდიდეს მწარმოებლებს თავად სთხოვა ბუსტერების ისეთი მოდიფიცირება, რომ ის მსოფლიოში ახლა ფართოდ გავრცელებულ ორ ქვევარიანტს გამკლავებოდა. ამერიკის შეერთებულ შტატებში ინფიცირებულთა დაახლოებით 88 % -ს ამჟამად სწორედ BA.5 აქვს. მწარმოებლებს უშუალოდ BA.4/BA.5 ქვევარიანტების წინააღმდეგ მიმართული ბუსტერები ჯერ ადამიანებზე არ გამოუცდიათ. FDA-მ გადაწყვეტილება წინა ვაქცინების უსაფრთხოებისა და ეფექტურობის მონაცემებზე დაყრდნობით, და იმ კლინიკური კვლევების საფუძველზე მიიღო, რომელიც ომიკრონის BA.1 ქვევარიანტის წინააღმდეგ შექმნილი ბივალენტური ბუსტერის შექმნისას ჩატარდა.
ამერიკის დაავადებათა კონტროლისა და პრევენციის ცენტრის (CDC) ვაქცინების თაობაზე მომუშავე მრჩეველთა საბჭო 1 სექტემბერს შეიკრიბება და და განახლებული ვაქცინების შესახებ საბოლოო გადაწყვეტილებას სწორედ ის მიიღებს.
