რუსული ტექნოლოგიური კომპანია „იანდექსი“ ირწმუნება, რომ მათი კომპანიის სერვერებზე მსოფლიოში ერთ-ერთი ყველაზე დიდი კიბერთავდასხმა მოხდა. კომპანიის მიერ გავრცელებულ განცხადებაში წერია, რომ თავდასხმა მათ სერვერებზე აგვისტოში დაიწყო და პიკს 5 სექტემბერს მიაღწია.
იანდექსის წარმომადგენლები იმასაც ამბობენ, რომ მათ კიბერთავდასხმის მოგერიება შეძლეს.
„ჩვენმა ექსპერტებმა მოახერხეს რეკორდულად დიდი თავდასხმის მოგერიება (22 მილიონი მოთხოვნა წამში)“ - წერია გავრცელებულ განცხადებაში. კომპანიის წარმომადგენლები განმარტავენ, რომ თავდამსხმელების სამიზნე მხოლოდ ისინი არ ყოფილან, მათი განმარტებით თავდასხმა მსოფლიოს სხვა კომპანიებზეც მოხდა.
„თავდასხმები რამდენიმე კვირაა მიმდინარეობს და მათი მასშტაბი უპრეცედენტოა. მათი წყარო არის ახალი ბოტნეტი, რომლის შესახებ ცოტა ინფორმაცია გვაქვს,“ - ამბობენ იანდექსის წარმომადგენლები.
აგვისტოში თავდასხმა მოხდა ამერიკულ კომპანია „ქლაუდფლერ“-ზე, კომპანიაზე რომელიც თავის მხრივ მსოფლიო მასშტაბით ათასობით ორგანიზაციასა და მცირე ბიზნესს ემსახურება. მაშინ კომპანია ამბობდა, რომ მათ სერვერებზე წამში 17 მილიონი მოთხოვნა ფიქსირდებოდა. „ქლაუდფლრ“-ის წარმომადგენლები ამბობენ, რომ რეალურად მათზე თავდასხმა გაცილებით ძლიერი იყო.
Facebook Forum