რუსეთის სახელმწიფო დუმის სპიკერის, ვიაჩისლავ ვოლოდინის ოკუპირებულ აფხაზეთში ჩასვლას განცხადებით გამოეხმაურა საქართველოს საგარეო უწყება.
„საქართველოს საგარეო საქმეთა სამინისტრო მკაცრად გმობს საქართველოს სახელმწიფო საზღვრის დარღვევით, რუსეთის ფედერაციის სახელმწიფო დუმის თავმჯდომარის, ვიაჩესლავ ვოლოდინის ჩასვლას ოკუპირებულ აფხაზეთის რეგიონში, რაც წარმოადგენს მოსკოვის მხრიდან საერთაშორისო სამართლის ფუნდამენტური პრინციპებისა და ნორმების მორიგ უხეშ დარღვევას, სუვერენული სახელმწიფოს ტერიტორიულ მთლიანობის ხელყოფის პოლიტიკის გაგრძელებას და საერთაშორისო ვალდებულებების, მათ შორის, ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების უგულებელყოფის მორიგ ფაქტს", - ნათქვამია განცხადებაში.
ვოლოდინი სოხუმში 1 დეკემბერს ჩავიდა. ის შეხვდა დე ფაქტო პრეზიდენტს, ასლან ბჟანიას.
ვოლოდინთან ერთად შეხვედრას ესწრებოდნენ დუმის ვიცე-სპიკერი სერგეი ნევეროვი, დამოუკიდებელ სახელმწიფოთა თანამეგობრობის საკითხების და ევრაზიული ინტეგრაციის კომიტეტის თავმჯდომარე ლეონიდ კალაშნიკოვი და რუსეთის ფედერაციის ე.წ. ელჩი აფხაზეთში მიხაილ შურგალინი.
Facebook Forum