რუსული იარაღი ერაყში

რუსეთი ერაყთან იარაღით ვაჭრობის შესახებ ახალ ხელშეკრულებას დებს. კონტრაქტის თანახმად, ერაყი მისგან 4.2 მილიარდი დოლარის ოდენობის იარაღს შეისყიდის.

რუსეთის მთავრობამ აღნიშნული განცხადება დღეს პრემიერ-მინისტრ დმიტრი მედვედევისა და მოსკოვში ვიზიტით მყოფი მისი ერაყელი კოლეგის, ნური ალ-მალიკის შეხვედრის დასრულებისთანავე გააკეთა. შეთანხმება სხვა დანარჩენთან ერთად, „პანცირ-ეს-1“ ტიპის ჰაერსაწინაღო სარაკეტო სისტემების და „მი-28“ სამხედრო ვერტმფრენების ექსპორტს ითვალისწინებს.

ერთობლივი განცხადების მიხედვით, ორმა მხარემ შეთანხმებას ჯერ კიდევ აპრილის დასაწყისში რუსეთში ერაყის დელეგაციის ვიზიტის დროს მიაღწია. ოფიციალურ პირებს შორის მოსკოვს ერაყის თავდაცვის მინისტრი, სადუნ ალ-დულამიც სტუმრობდა. ერაყის დელეგაცია მას შემდეგ რუსეთში კიდევ ივლის-აგვისტოშიც იმყოფებოდა.