უკრაინის შეიარაღებული ძალების ცნობით, გასული ღამის განმავლობაში ქვეყანაში რუსეთმა 30-ზე მეტი იერიში მიიტანა - 31 დრონით, 2 კი - სარაკეტო იერიში იყო. საჰაერო თავდაცვის ძალების ცნობით, განადგურებულია ორივე რაკეტა და 28 დრონი.
"უკრაინის საჰაერო და თავდაცვის ძალებმა გაანადგურეს 28 "შაჰიდი" დრონი ოდესაში, ხერსონში, მიკოლაივში, დონეცკში, კიროვოჰრადსა და ხმელნიცკის რეგიონებში", - აცხადებს უკრაინის საჰაერო ძალების პრეს-სამსახური "ტელეგრამის" არხზე. მათი განმარტებით, დრონები რუსეთის მიერ ოკუპირებული ყირიმის ნახევარკუნძულიდან იყო გაშვებული.
საჰაერო ძალების ცნობითვე, ჩამოგდებული დრონების ნამსხვრევებმა ოდესის პორტში ერთ-ერთი ტექნიკური დაწესებულების შენობა დააზიანა, ასევე ადმინისტრაციული შენობა და საწყობი, რომლებიც არ გამოიყენებოდა.
ხერსონის რეგიონში, ერთ-ერთ საწყობში თავდასხმის გამო ცეცხლი გაჩნდა, თუმცა მოქალაქეები არ დაშავებულან.
უკრაინის შეიარაღებული ძალების წარმომადგენლები იმეორებენ აქამდე გავრცელებულ ცნობებსაც იმის შესახებ, რომ მათ მარიუპოლის სიახლოვეს და ოკუპირებულ ქალაქ დონეცკის მახლობლად ორი სამხედრო თვითმფრინავი ჩამოაგდეს.
კვირას, რუსულმა და უკრაინულმა შეიარაღებულმა ძალებმა, ორივემ განაცხადა, რომ მოწინააღმდეგის საჰაერო ხომალდები ჩამოაგდო, თუმცა 1000 კმ-იანი ფრონტის ხაზის სხვადასხვა ნაწილში. ჟურნალისტებს ამ ცნობების დამოუკიდებლად გადამოწმების შესაძლებლობა არ აქვთ.
