პარლამენტში „ქართული ოცნებისა“ და ოპოზიციის დეპუტატებს შორის, დაახლოებით 30 წუთის განმავლობაში, ჩხუბი და დაპირისპირება იყო .
ოპოზიციის პროტესტი უკავშირდება აშშ-ის მიერ ყოფილი გენპროკურორის, ოთარ ფარცხალაძის სანქცირების გარშემო განვითარებულ პროცესებს. დეპუტატები მოითხოვდნენ, დღეს პარლამენტში დებატები ფარცხალაძის შესახებ გამართულიყო, თუმცა სხდომა არსებული დღის წესრიგით წარიმართა - კულტურის მინისტრის, თეა წულუკიანის მოსმენით.
დარბაზიდან გააძევეს „სტრატეგია აღმაშენებლის“ ლიდერი გიორგი ვაშაძე. პარლამენტის ფოიეში ოპოზიციონერ გიორგი ვაშაძესთან ფიზიკურად იჩხუბეს დეპუტატებმა ირაკლი ზარქუამ და ვიქტორ სანიკიძემ.
ოპოზიციონერმა დეპუტატმა ქალებმა ტრიბუნასთან, სადაც წულუკიანი სიტყვით გამოდიოდა, გაშალეს ბანერი უკრაინელი მებრძოლის ცნობილი ფრაზით რუსული ხომალდის შესახებ.
„ქართული ოცნების“ თავმჯდომარეს, რომელიც დერეფანში ჟურნალისტებს კომენტარს აძლევდა, "ნაციონალური მოძრაობის" წევრმა, დეპუტატმა ანა წითლიძემ „რუსი“ უწოდა, კობახიძემ წითლიძეს კი - აგენტი.
სიტყვიერი დაპირისპირება იყო მიხეილ ყაველაშვილს, მამუკა მდინარაძესა და ალეკო ელისაშვილს შორის. ისინი დეპუტატების ოთახში შევიდნენ, სადაც მედიის წარმომადგენლებს არ უშვებენ.
14 სექტემბერს ცნობილი გახდა, რომ აშშ-ის სახელმწიფო დეპარტამენტის დოკუმენტის მიხედვით, საქართველოს ყოფილ მთავარ პროკურორს, ოთარ ფარცხალაძეს, სანქციები დაუწესდა საქართველოზე რუსეთის მანკიერი ზეგავლენის საპასუხოდ.
ამ სანქციების გამო ოთარ ფარცხალაძეს "აქტივებზე წვდომა და ფინანსური ტრანზაქციების შესრულება" უნდა შეზღუდოდა.
!["ის, რომ ეს ადამიანი [ფარცხალაძე] ივანიშვილთან დაახლოებული პირია, მხოლოდ ესეც გზავნილია", - ჯონათან კაცი](https://gdb.voanews.com/01000000-0aff-0242-678c-08dbb8430c37_tv_w250_r1.jpg "\"ის, რომ ეს ადამიანი [ფარცხალაძე] ივანიშვილთან დაახლოებული პირია, მხოლოდ ესეც გზავნილია\", - ჯონათან კაცი")
