პარასკევს, შეერთებულ შტატებში კორონავირუსის 121 ათასზე მეტი ახალი შემთხვევა აღირიცხა. ეს მიყოლებით მესამე დღე იყო, როდესაც ქვეყანაში100 ათასზე მეტი ახალი ინფიცირების შემთხვევა გამოვლინდა.
ინფიცირება შეერთებული შტატების ყველა რეგიონში მკვეთრად იზრდება და “კოვიდ-19”-ის მსხვერპლთა რიცხვიც ზემოთ მიიწევს.
ასევე ნახეთ: ბრიტანეთში კოვიდ-19 დასტაბილურდა: დღეში 50 000 ინფიცირების შემთხვევაა
შეერთებულ შტატებში ჰოსპიტალიზაციების რიცხვი მნიშვნელოვნად გაიზარდა, რის გამოც შუა-დასავლეთის და სამხრეთის შტატები იძულებული გახდნენ, ახალი პაციენტების დიდი ტალის მისაღებად საგანგებო ზომები მიეღოთ.
ყველაზე მძიმე დარტყმის ქვეშ შუა-დასავლეთის შტატები აღმოჩნდნენ. ილინოისში, ინდიანაში, აიოვაში, მინესოტაში, ჩრდილოეთ დაკოტაში, ნებრასკაში და ოკლაჰომაში ინფიცირებების სარეკორდო რიცხვი აღრიცხეს.
სექტემბრის შუა რიცხვებში ვითარების გამწვავების შემდეგ, ზოგიერთი შტატი პერიოდულად შეზღუდვების ნაწილობრივ ზომებს მიმართავდა. მეინის შტატში პირბადის ტარების მოთხოვნა ყველა საჯარო სივრცეზე გაავრცელეს.
ასევე ნახეთ: მსოფლიოში კოვიდ 19-ით 1,2 მილიონზე მეტი ადამიანია გარდაცვლილი
პარასკევს, კოლორადოს ხელისუფლებამ, კორონავირუსის მზარდი ტალღის შესაჩერებლად, მოსახლეობას დაჟინებით მოუწოდა, საღამოს 10 საათიდან დილის 5 საათამდე სახლში დარჩნენ.
ჯონს ჰოპკინსის სტატისტიკის თანახმად, ამჟამად შეერთებულ შტატებში ინფიცირების 9.7 მილიონი შემთხვევაა აღრიცხული, მეორე ადგილზეა ინდოეთი, სადაც კორონავირუსის 8.4 მილიონი შემთხვევაა დადგენილი.