5 მარტს, შეერთებულ შტატებში ორივე, როგორც დემოკრატიული, ისე რესპუბლიკური პარტიის წინასაარჩევნო რბოლის ერთ-ერთი მნიშვნელოვანი ეტაპი, ე.წ. “სუპერ სამშაბათი” იმართება. დღეს ორივე პარტიის ამომრჩეველი, რესპუბლიკელები 15 შტატში და დემოკრატები 14-ში, ერთად აძლევს ხმას საპრეზიდენტო კანდიდატობაზე მათ სასურველ პრეტენდენტს.
ამერიკის პრეზიდენტი, ჯო ბაიდენი სავარაუდოდ იოლად მოახერხებს ყველა შტატში გამარჯვებას. თუმცა, აქტივისტები ბაიდენის ისრაელის მიმართ პოლიტიკას აკრიტიკებენ და ისეთ შტატში, როგორიცაა მინესოტა, მუსლიმ და პარტიის უფრო რადიკალურ მემარცხენე, "პროგრესულად" განწყობილ ამომრჩეველს მოუწოდებენ ხმა “გადაუწყვეტლად” მისცენ.
ასევე ნახეთ: "სუპერ სამშაბათი" აშშ-ში81 წლის ბაიდენი თავისი პარტიის ამომრჩევლის ნაწილში, ისრაელისადმი მტკიცე მხარდაჭერის გამო, ბრაზს იწვევს. ამომრჩევლის პროტესტის მიზეზი ის ცნობებია, რომლის მიხედვითაც, ისრაელის მიერ, ღაზაში დაწყებულმა ომმა, ჰუმანიტარული კატასტროფა გამოიწვია და ამ და სხვა მიზეზების გამო, 30, 000-ზე მეტი ადამიანი დაიღუპა. ისრაელი ამ ომით, პასუხობს ჰამასის 7 ოქტომბრის თავდასხმას, რომელმაც 1,200 ადამიანის სიცოცხლე შეიწირა.
ბაიდენი თავისი პარტიის მხრიდან უფროდაუფრო მეტი წნეხის ქვეშაა, რათა გაზარდოს ზეწოლა ისრაელზე, ცეცხლის შეწყვეტის მიზნით.
მინესოტას შტატში, “გადაუწყვეტელად” ხმის მიცემის მოწოდება მას შემდეგ გაისმა, რაც 100,000-ზე მეტი ადამიანი შეუერთდა მსგავს პროტესტს მიჩიგანში გამართულ დემოკრატიულ პრაიმერზე.
ორგანიზატორები ამბობენ, რომ არ მოელიან, რომ მინესოტაში ხმების 13%-ს მოიპოვებენ, როგორც მიჩიგანში. თუმცა იმედოვნებენ, რომ მათი ეს პროტესტი ადმინისტრაციის პოლიტიკაზე, საარჩევნო რბოლის ფონზე, გავლენას მოახდენს.