როგორც ისრაელი, ისე პალესტინელების მხარე ადასტურებს, რომ ისრაელის ჯარები 15 თებერვალს ღაზის სამხრეთით მდებარე მთავარ საავადმყოფოში შეიჭრა. შტურმის დროს, ერთ-ერთი პაციენტი ხანძარში დაიღუპა და ექვსი დაიჭრა.
ისრაელი აცხადებს, რომ ნასერის საავადმყოფოში გარკვეული ხანი "ჰამასის" მიერ გატაცებული მძევლები ჰყავდათ და ამ ოპერაციით მათი კვალის მიგნებას ცდილობენ. ნასერის საავადმყოფოს, რომელიც ღაზის სექტორის ქალაქ ხან-იუნისში მდებარეობს, ათასობით დევნილი აფარებდა თავს.
ასევე ნახეთ: ისრაელი რაფაში სამხედრო ოპერაციისთვის ემზადებაისრაელის მიერ "ჰამასის" წინააღმდეგ დაწყებულ საპასუხო ომს დასასრული ჯერ არ უჩანს. პარალელურად იზრდება კონფლიქტის გაფართოების რისკი, რადგან ბოლო დროს ისრაელმა და ლიბანის "ჰეზბოლამ" ერთმანეთზე თავდასხმა გაახშირეს.
ისრაელის შეიარაღებული ძალები აცხადებენ, რომ მათ მძევლების ნასერის საავადმყოფოში ყოფნის თაობაზე დაზვერვის "სანდო" ცნობები ჰქონდათ. ამ ეტაპზე საავადმყოფოს ჩხრეკენ და ამოწმებენ, ეძებენ მძევლების კვალს.
არმიის პრესსპიკერი დანიელ ჰაგარი ამბობს, რომ ისრაელის ძალები იქ დამიზნებულ, "ზუსტ და შეზღუდულ" ოპერაციას ატარებენ და არ აპირებენ საავადმყოფოს მუშაობის შეჩერებას, იქიდან ექიმების და პაციენტების იძულებით ევაკუაციას. ისრაელი ომის დაწყების დღიდან აცხადებს, რომ "ჰამასი" საავადმყოფოებს და სხვა სამოქალაქო ინფრასტრუქტურას საკუთარი მებრძოლების დასაცავად და თავშესაფრად იყენებს.
სამშვიდობო მოლაპარაკება ისრაელს და პალესტინელებს შორის ჩიხშია შესული. ისრაელის პრემიერ-მინისტრი ბენიამინ ნეთანიაჰუ იმუქრება, რომ იერიშს "ჰამასის" განადგურებამდე და მძევლების დაბრუნებამდე გააგრძელებს.