ღაზის სექტორის ჩრდილოეთში "ჰამასის" ტყვეობაში მოკლული ხუთი ისრაელელი მძევალი იპოვეს. მათი ცხედრები მიწისქვეშა გვირაბების ქსელში აღმოაჩინეს. ინფორმაციას ამის შესახებ ისრაელის სამხედრო უწყება ავრცელებს.
სიკვდილის შესაძლო მიზეზებზე განცხადებაში არაფერია ნათქვამი. ისრაელის შეიარაღებული ძალების მთავარი პრესსპიკერი, ადმირალი დენიელ ჰაგარი განმარტავს, რომ მომხდარის შესახებ დეტალებს ისინი ჯერ დაღუპულთა ოჯახებს შეატყობინებენ და ამის შემდეგ, მათი ნებართვის შემთხვევაში, ინფორმაცია საჯაროდ გამოქვეყნდება.
ასევე ნახეთ: პალესტინელთა 72% ფიქრობს, 7 ოქტომბერს ისრაელზე "ჰამასის" თავდასხმა "სწორი" იყოჯერჯერობით ცნობილია მხოლოდ ის, რომ ნაპოვნ ცხედრებს შორის სამი ჯარისკაცი და ორი მშვიდობიანი მოქალაქეა. ისინი იმ 240 ადამიანს შორის იყვნენ, რომლებიც "ჰამასის" შეიარაღებულმა პირებმა 7 ოქტომბერს, ისრაელზე თავდასხმის დროს გაიტაცეს და ღაზის სექტორში გადაიყვანეს.
მომხდარის გამო, ისრაელმა ომი გამოუცხადა "ჰამასს" და ღაზის სექტორის აქტიური დაბომბვა დაიწყო, რასაც მოგვიანებით სახმელეთო იერიშებიც მოჰყვა. "ჰამასი" შეერთებულ შტატებს, დიდ ბრიტანეთს, ევროკავშირსა და დასავლეთის სხვა ქვეყნებს ტერორისტულ ორგანიზაციად ჰყავთ გამოცხადებული.
ღაზაში შენობების მეხუთედი დანგრეულია - გაერო