19 აგვისტოს, თელ-ავივში ერთი დღით ადრე მომხდარ აფეთქებაზე პასუხისმგებლობა "ჰამასისა" და "ისლამური ჯიჰადის" შეიარაღებულმა განშტოებებმა აიღო. სინაგოგასთან კვირა საღამოს მომხდარი აფეთქება ისრაელის პოლიციამ და დაზვერვის სააგენტომ ტერორისტულ თავდასხმად შეაფასა. პოლიციის ცნობით, ინციდენტში ერთი გამვლელი დაშავდა და მოკლულია მამაკაცი, რომელსაც თან ბომბი ჰქონდა.
ასევე ნახეთ: ღაზის ზავისთვის „შესაძლო ბოლო შესაძლებლობა“ - ბლინკენი ისრაელშიაისრაელმა "ჰამასის" წინააღმდეგ ომი 7 ოქტომბერს, „ჰამასის“ თავდასხმის პასუხად დაიწყო. არაერთი დასავლური ქვეყნის მიერ ტერორისტულ ორგანიზაციად გამოცხადებულმა "ჰამასმა", ისრაელზე თავდასხმისას, 1 200 ადამიანი მოკლა, მეტწილად, მშვიდობიანი მოსახლეობა. ამასთან, დაჯგუფებამ 250 ადამიანი დაატყვევა და ღაზაში მძევლად წაიყვანა.
ნოემბერში, ხანმოკლე ცეცხლის შეწყვეტის შეთანხმების მიღწევის შედეგად, 100-ზე მეტი ისრაელელი მძევალი გათავისუფლდა. მიიჩნევა, რომ ღაზაში, დაახლოებით, 110 მძევალი კვლავ რჩება. ისრაელის ხელისუფლება აცხადებს, რომ მძევალთა მესამედი მოკლულია.
„ჰამასის“ მიერ კონტროლირებული ღაზის ჯანდაცვის უწყება აცხადებს, რომ ისრაელის საპასუხო ომის შედეგად, ამ დრომდე, პალესტინელთა შორის მსხვერპლმა 40 000-ს გადააჭარბა. ისინი არ აკონკრეტებენ, დაღუპულთა შორის, რამდენია მებრძოლი და რამდენი მშვიდობიანი მოქლაქე. თავის მხრივ, მტკიცებულებების წარმოდგენის გარეშე, ისრაელი აცხადებს, რომ ღაზაში მიმდინარე ომის განმავლობაში, „ჰამასის“ 17 000-ზე მეტი მებრძოლი მოკლა.