ძალაში შევიდა ბელარუსის სახელმწიფო უშიშროების კომიტეტსა და საქართველოს სახელმწიფო უსაფრთხოების სამსახურს შორის თანამშრომლობის შესახებ სახელმწიფოთაშორისი შეთანხმება. დოკუმენტი 13 აგვისტოს ოფიციალურად გამოქვეყნდა ბელარუსის შესაბამისი ორგანოს ვებსაიტზე. ამის შესახებ ინფორმაციას "რადიო თავისუფლება" ავრცელებს.
როგორც იუწყება reform.by, შეთანხმება შემუშავებული იყო ხუთ წელზე მეტი ხნის წინ და მხარეებმა მას ხელი მოაწერეს ჯერ კიდევ 2016 წელს, მაგრამ ამას მოჰყვა შიდა პროცედურების დამტკიცება, რომელმაც ხუთ წელიწადს გასტანა.
ასევე ნახეთ: ბელარუსში არჩევნების გაყალბების ერთი წლის თავზე, აშშ ლუკაშენკოს რეჟიმს დამატებით სანქციებს უწესებსახლა კი შეთანხმება შევიდა ძალაში და მისი მოქმედება 2021 წლის 1 აგვისტოდან დაიწყო.
2016 წელს დოკუმენტის ხელმოწერის დროს სუს-ს ხელმძღვანელობდა ვახტანგ გომელაური, ამჟამინდელი შინაგან საქმეთა მინისტრი.
შეთანხმება ბელარუსის სახელმწიფო უშიშროების კომიტეტსა და სუს-ს შორის თანამშრომლობის რეგლამენტირებას ახდენს. ეს ეხება ინფორმაციის გაცვლას, ხელშეწყობას ისეთი დანაშაულების წინააღმდეგ ბრძოლაში, როგორიცაა: სახელმწიფო უსაფრთხოების წინააღმდეგ მიმართული დანაშაული, ტერორიზმი და კიბერტერორიზმი, ორგანიზებული დანაშაული, იარაღის უკანონო ბრუნვა, კორუფცია, საიდუმლო ინფორმაციის გამჟღავნება და სხვ.
ასევე ნახეთ: რუსეთი და ბელარუსი მასშტაბურ ერთობლივ წვრთნებს ჩაატარებენთანამშრომლობის ფორმები ითვალისწინებს მოთხოვნების შესრულებას და პერსონალური ინფორმაციის გადაცემას, ერთობლივი ღონისძიებების გამართვას, გამოცდილების გაზიარებას და ა.შ.
შეთანხმება ასევე ითვალისწინებს უსაფრთხოების საკითხებში წარმომადგენლების ან ატაშეების ერთობლივად გაგზავნას სხვა სახელმწიფოს ტერიტორიაზე კონკრეტული ან განუსაზღვრელი ვადით.
ბელარუსს ანალოგიური შეთანხმებები გაფორმებული აქვს სხვა ქვეყნებთანაც, მათ შორის, უკრაინასთან.