ოთხშაბათს ეთერში გასულ კომენტარებში, პრეზიდენტმა ვოლოდიმირ ზელენსკიმ უკრაინის მიერ ქალაქ ავდიივკის დაკარგვა ნაკლებად მნიშვნელოვნად წარმოაჩინა და მოკავშირეებს მოუწოდა, ომის მეორე წლისთავის მოახლოებასთან ერთად დახმარება დააჩქარონ.
რუსეთის ჯარმა ავდიივკაზე კონტროლი გასულ კვირაში მოიპოვა. ეს, გასული წლის მაისში ბახმუტის დაკავების შემდეგ, მოსკოვის ყველაზე დიდი საბრძოლო გამარჯვება იყო. ვლადიმირ პუტინი ამბობს, რომ რუსეთი აღმოსავლეთ უკრაინაში თავის შეტევას გააგრძელებს.
ზელენსკიმ „ფოქს ნიუსისთვის“ მიცემული ინტერვიუდან ამონარიდში აღიარა, რომ გასული წელი უკრაინისთვის „რთული“ იყო, კერძოდ 2023 წლის ბოლო.
ასევე ნახეთ: ამერიკის სენატმა უკრაინის დახმარების პაკეტი დაამტკიცა, თუმცა გადაწყვეტილება საბოლოო არ არისმაგრამ მან ადრინდელ წარმატებებზე მიუთითა, კერძოდ ჩრდილო-აღმოსავლეთ ხარკივის რეგიონის შესახებ, სადაც „ფოქსს“ ინტერვიუს აძლევდა.
„ამ ორი წლის განმავლობაში ხარკივის რეგიონის ნაწილი დავიბრუნეთ. ახლა ამ რეგიონში ვართ... და შავი ზღვის ბლოკადა გავარღვიეთ. არის მარცვლეულის მარშრუტები და რუსეთის ფლოტის ბევრი ხომალდი გავანადგურეთ”, თქვა ზელენსკიმ.
„ეს არის, რაც ორ წელიწადში გავაკეთეთ და მათ რის გაკეთება შეძლეს? მხოლოდ ეს ერთი ადგილი, მაგრამ რისთვის?“
ავდიივკა რუსეთის მიერ ოკუპირებული დონეცკის ჩრდილო-დასავლეთით, 15 კილომეტრის დაშორებით მდებარეობს.
რუსი ანალიტიკოსები ამბობენ, რომ ავდიივკის აღება, დონეცკს უკრაინული საარტილერიო ცეცხლისგან უსაფრთხოებას მისცემს, სანამ მოსკოვი გეგმებს აწყობს თუ დონეცკის და ლუჰანსკის რეგიონების სრულად დასაპყრობად თავისი შეტევა როგორ გააგრძელოს.
ზელენსკიმ თავის კომენტარებში დასავლური დახმარების შენელების გამო ახალი უკმაყოფილება გამოთქვა, თუმცა შეერთებული შტატები გამორჩეულად არ ახსენა.
შეერთებული შტატების სენატმა 95 მილიარდი დოლარის მოცულობის დახმარების პაკეტის კანონპროექტი მიიღო, რომელიც უკრაინის დაფინანსებასაც შეიცავს, მაგრამ წარმომადგენელთა პალატის სპიკერმა მაიკ ჯონსონმა კანონპროექტის კენჭისყრაზე უარი თქვა.