სამშაბათს, ორი ქვეყნის სამხედრო უწყებებმა განაცხადეს, რომ შეერთებული შტატების სამხედრო ფლოტის საბრძოლო გემმა და კანადურმა ფრეგატმა ტაივანის სრუტეში ჩვეულებისამებრ გაცურეს იმ დროს, როდესაც პეკინსა და ტაიპეის შორის სამხედრო დაძაბულობა გამწვავებულია.
ეს ამ თვეში ამერიკული სამხედრო ხომალდის მეორე გასვლა იყო და 2021 წლის ოქტომბრიდან, აშშ-ის და კანადის მეორე ერთობლივი გასვლა.
ჩინეთმა ეს მისია დაგმო და აცხადებს, რომ ხომალდებს „გაფრთხილება“ მისცა, თუმცა ბოლო წლებში სრუტე ბევრმა ამერიკულმა და ხანდახან მოკავშირე ქვეყნების, როგორებიცაა ბრიტანეთი და კანადა, სამხედრო ხომალდმა გაცურა.
ასეთი მოძრაობა აღიზიანებს ჩინეთს, რომელიც ტაივანს, ამ კუნძულის დემოკრატიულად არჩეული მთავრობის წინააღმდეგობის მიუხედავად, თავის ტერიტორიად აცხადებს.
აშშ-ის სამხედრო ფლოტმა თავის განცხადებაში თქვა: „ასეთი თანამშრომლობა ჩვენი მიდგომის მთავარი ნაწილია, რომელიც რეგიონის უსაფრთხოებისა და წარმატებისკენაა მიმართული.“
„არლეი-ბურკ“ კლასის, ფრთოსანი რაკეტებით აღჭურვილმა საესკადრო ნაღმოსანმა „ჰიგინსმა“ და კანადის სამეფო სამხედრო ფლოტის „ჰალიფაქსის“ კლასის ფრეგატმა „ვანკუვერმა“ სრუტე გაიარეს დერეფნით, რომელიც ნებისმიერი სანაპირო სახელმწიფოს ტერიტორიული წყლების მიღმაა“, ნათქვამია განცხადებაში.
ტაივანის საგარეო საქმეთა სამინისტრო ამ ქმედებას მიესალმა.
ჩინეთის სახალხო გამათავისუფლებელი არმიის სარდლობამ განაცხადა, რომ მისი ძალები ხომალდებს აკვირდებოდნენ და მათ „გაფრთხილება მისცეს“.
1949 წლის შემდეგ, როდესაც კომუნისტებთან დამარცხებული ჩინეთის რესპუბლიკის მთავრობა ტაივანში გაიქცა, ტაივანის ვიწრო სრუტე სამხედრო დაძაბულობის წყარო ხშირად იყო.
