ეროვნულ საკალათბურთო ასოციაციაში (NBA) ოკლენდელი „მეომრების“ დიდი გუნდი - „გოლდენ სტეიტ უორიორსი“ მეოთხე სანუკვარი ტიტულისკენ მიიწევს. „მეომრების“ ძირითადი ცენტრი ზაზა ფაჩულია კი კარიერის და ქართული კალათბურთის ისტორიის ახალ დიდ ფურცელს წერს.
33 წლის ფაჩულია პირველი ქართველია, რომელიც NBA-ს კონფერენციის ფინალურ სერიას თამაშობს და რაც მთავარია, დიდი შანსი აქვს, ყველა კალათბურთელის საოცნებო, ნაციონალური საკალათბურთო ასოციაციის ფინალურ სერიაში ითამაშოს და საჩემპიონო ბეჭედიც მოიპოვოს.
დღეს, გამთენიისას, „გოლდენ სტეიტმა“ დასავლეთ კონფერენციის ფინალის მეორე მატჩში 136:100 გაანადგურა „სან ანტონიო სპურსი“ და სერიაში 2-0 დაწინაურდა. ფაჩულიამ მხოლოდ 7 წუთი ითამაშა, 4 ქულა დააგროვა და ტრავმის გამო მალე დატოვა მოედანი.
თუმცა, ყველა საკალათბურთო ექსპერტი თანხმდება - იმაში, რომ „გოლდენი“ სერიაში 2-0-ს იგებს, ფაჩულიას დიდი წვლილია. 14 მაისს, სერიის პირველ მატჩში საქართველოს ნაკრების კაპიტანმა როგორც შეტევაში, ისე დაცვაში ერთ-ერთი საუკეთესო მატჩი ჩაატარა.
ფაჩულიამ 26 წუთში 11 ქულა და 9 მოხსნა დააგროვა. რაც მთავარია ძალიან მაგრად იბრძოლა „სან ანტონიოს“ ლიდერების ლამარკუს ოლდრიჯისა და კავაი ლეონარდის წინააღმდეგ. ლეონარდი სწორედ ფაჩულიას წინააღმდეგ თამაშისას დაშავდა. მისი მოედნიდან გასვლის შემდეგ კი „მეომრებმა“ 25 ქულიანი ჩამორჩენა ამოქაჩეს და საბოლოოდ, თრილერი 113-111 მოიგეს.
ტრავმირებული კავაი ლეონარდის გარეშე „სან ანტონიო“ დღეს, საერთოდ უნიათოდ გამოიყურებოდა, 36 ქულიანი სხვაობით განადგურდა და ახლა 20 მაისს, ელოდება, როცა სერია უკვე ტეხასში, AT&T ცენტრში გაგრძელდება.
კონფერენციის ფინალური სერიის დაწყებამდე ზაზა ფაჩულია Sporting News-ს გამოუტყდა, რომ როგორც მთელი გუნდი, ისე პირადად, უზარმაზარი ზეწოლის ქვეშ იმყოფება:
არასოდეს მითამაშია გუნდში, რომლისგანაც ასე ბევრს ითხოვენ. კარგ გუნდებში მითამაშია, მაგრამ ასეთ სიტუაციაში ცხოვრებაში პირველად მოვხვდი. ყველა ითხოვს მხოლოდ ჩემპიონის ტიტულს და სხვას არაფერს"ზაზა ფაჩულია, „გოლდენ სტეიტ უორიორსის“ ცენტრი
"არასოდეს მითამაშია გუნდში, რომლისგანაც ასე ბევრს ითხოვენ. კარგ გუნდებში მითამაშია, მაგრამ ასეთ სიტუაციაში ცხოვრებაში პირველად მოვხვდი.
ყველა ითხოვს მხოლოდ ჩემპიონის ტიტულს და სხვას არაფერს. "უორიორსი" ასევე ძალიან პოპულარულია მთელ მსოფლიოში, ის ყველას ყურადღების ცენტრშია. მარტო ჩვენი ფანები კი არა, ოპონენტთა ფანებიც გვაკვირდებიან.“
ოპონენტთა, ამ შემთხვევაში, „სან ანტონიო სპურსის“ ფანების აგრესიული ყურადღება ფაჩულიამ დასავლეთ კონფერენციის ფინალის პირველივე მატჩის შემდეგ იგრძნო.
ტეხასელებმა 14-16 მაისს, „ტვიტერში“ ფაჩულიას ოფიციალურ გვერდზე ნამდვილი „ჯვაროსნული ლაშქრობა“ მოაწყვეს და ერთხმაში ამტკიცებდნენ, რომ „სპურსის“ ლიდერი კავაი ლეონარდი ზაზამ მიზანმიმართულად გამოიყვანა მწყობრიდან. აგრესია იმდენად დიდი იყო, რომ ფაჩულია იძულებული გახდა „ტვიტერზე“ კომენტარები დროებით დაებლოკა.
იმის მიუხედავად, რომ თავად კავაი ლეონარდმა აღნიშნა, ზაზას მხრიდან განზრახ უხეშობას ადგილი არ ჰქონიაო, ფაჩულიას უმწვავესი კრიტიკა მაინც გააგრძელა ლეგენდარულმა ამერიკელმა მწვრთნელმა გრეგ პოპოვიჩმა, რომელიც ოცდამეერთე წელია „სან ანტონიო სპურსს“ უდგას სათავეში.
პოპოვიჩმა პირდაპირ დაადანაშაულა ზაზა, რომ მან შეგნებულად დააბიჯა ფეხი და მიაყენა ტრავმა ლეონარდს, მისი გამოთიშვით კი სერიაში „გოლდენის“ გამარჯვების შანსები კიდევ უფრო გაზარდა. „ეს საშიშია. ეს არასპორტულია. ასე არ კეთდება. ეს კონკრეტული პერსონაჟი მსგავს ეპიზოდებში არაერთხელ არის შემჩნეული“ - თქვა პოპოვიჩმა.
ფაჩულია მძაფრი კრიტიკისგან მისმა თანაგუნდელებმა დაიცვეს, მათ შორის NBA-ს ვარსკვლავმა კევინ დურანტმა, რომელსაც ორი თვის წინ ზაზამ შემთხვევითი ტრავმა ასევე მიაყენა:
ზაზა არ არის ბინძური მოთამაშე. ჩვენ ასეთი გუნდი არ ვართ. ძნელია ისე გათვალო, რომ ზუსტად ასეთი ტრავმა მიაყენო მეტოქეს - ბოლომდე თამაში ჩართული როცა ხარ, ამ დეტალებს ყურადღებას ვერ მიაქცევ"კევინ დურანტი, „გოლდენ სტეიტ უორიორსის“ ერთ-ერთი ლიდერი
„ზაზა არ არის ბინძური მოთამაშე. ჩვენ ასეთი გუნდი არ ვართ. ძნელია ისე გათვალო, რომ ზუსტად ასეთი ტრავმა მიაყენო მეტოქეს - ბოლომდე თამაშში ჩართული როცა ხარ, ამ დეტალებს ყურადღებას ვერ მიაქცევ.
კავაი არაჩვეულებრივი მოთამაშეა. ჩვენ მას დიდ პატივს ვცემთ. იმედია მალე გამოჯანმრთელდება. ზაზა უბრალოდ ხელს უშლიდა მას სროლის შესრულებაში“
ზაზა ფაჩულია პირველ სეზონს ატარებს „გოლდენ სტეიტ უორიორსში“, რომელთაც კონტრაქტი 2016 წლის ივლისში გააფორმა. „მეომრებმა“ 67 მოგებით (15 წაგების წილ) გაიმარჯვეს NBA-ს რეგულარულ სეზონში, დასავლეთ კონფერენციაში.
NBA-ს პლეი-ოფებში კი ერთიანი ანგარიშით 4:0 სძლიეს ჯერ „პორტლენდი“, შემდეგ კი „იუტა ჯაზი“. კონფერენციის ფინალში უკვე 2:0-ს უგებენ „სან ანტონიო სპურს“ და დიდ ფინალში მოსახვედრად კიდევ ორი გამარჯვება სჭირდებათ.
NBA-ს ბეჭდებამდე ჯერ კიდევ შორია, თუმცა, ყველა შარშანდელი ფინალის განმეორების მოლოდინშია, მიუხედავად იმისა, რომ აღმოსავლეთ კონფერენციის ფინალური სერია - "კლივლენდსა" და "ბოსტონს" შორის მხოლოდ დღეს იწყება.
2016 წელს, ყველაზე დიდი საკალთბურთო ტიტული „გოლდენ სტეიტმა“ და "კლივლენდმა“ გაითამაშეს. თუ წელსაც იგივე განმეორდა, „მეომრებს“ რევანში აქვთ ასაღები, რადგან შარშანდელი ფინალის შვიდმატჩიანი თრილერი სენსაციურად (3-4) წააგეს.
Facebook Forum