სირიიდან ისრაელზე დრონით მიტანილი იერიშის შემდეგ, ისრაელმა საპასუხო იერიშები მიიტანა. ინფორმაციას ისრაელის თავდაცვის ძალები ავრცელებს. მათი სამიზნე იყო სავარაუდო საცეცხლე წერტილები, საიდანაც ისრაელზე თავდასხმა განხორციელდა.
სამხრეთ ისრაელში სკოლაზე მიტანილ იერიშზე პასუხისმგებლობა ამ დრომდე არცერთ ორგანიზაციას არ აუღია. იერიში წითელი ზღის გავლით განხორციელდა, სირიის ტერიტორიიდან 400 კილომეტრის დაშორებით.
პარალელურად, იემენის ირანთან დაკავშირებულმა ჯგუფმა ისრაელზე საჰაერო იერიშები განაახლა. ყველა საფრთხის განეიტრალება ისრაელმა რკინის გუმბათის სახელით ცნობილი, თავდაცვის სისტემებით მოახერხა.
ჰუთები, რომლებიც იმყოფებიან იემენის ტერიტორიაზე, ამბობენ, რომ მათ ისრაელის მიმართულებით ბალისტიკური რაკეტები გაუშვეს. მოგვიანებით ისრაელმა თქვა, რომ მათ იერიშები "პატრიოტის" სისტემების დახმარებით მოიგერიეს.
ამ ფონზე, ისრაელის ხელისუფლების გადაწყვეტილებით, გაძლიერდა უსაფრთხოების ზომები წითელი ზღვის მიმდებარე ტერიტორიაზე, რათა მზარდ საფრთხეებთან გამკლავება უფრო ეფექტურად მოხდეს.
ამ დრომდე დახურული რჩება აშკელონის პორტი, ისრაელის ეს ქალაქი ღაზის სექტორთან ახლოს მდებარეობს. წითელ ზღვაში კი რისკები გაზრდილია, რის გამოც მეზღვაურები უსაფრთხოების მაღალი სტანდარტებით ოპერირებენ.
ისრაელზე მეზობელი ქვეყნებიდან იერიშები მას შემდეგ გახშირდა, რაც ქვეყანამ "ჰამასს" ომი 7 ოქტომბრის თავდასხმის შემდეგ გამოუცხადა. ისრაელზე "ჰამასის" თავდასხმას 1 400 ადამიანის სიცოცხლე შეეწირა, 200-ზე მეტი ადამიანი კი მძევლად არის აყვანილი.
თავდასხმის საპასუხოდ დაწყებული ომი უკვე ერთი თვეა გრძელდება. ისრაელმა ღაზის სექტორში სახმელეთო ოპერაციებიც დაიწყო. სხვადასხვა წყაროს ინფორმაციით, რომლის დადასტურებაც ამ ეტაპზე შეუძლებელია, ღაზის სექტორში მშვიდობიან პალესტინელებში მსხვერპლი 10 000-ს უტოლდება. ყველა ეს მონაცემი "ჰამასის" მიერ კონტროლირებული სამედიცინო დაწესებულებების ჩანაწერებს ეყრდნობა.
ომი ღაზაში გრძელდება და ისრაელი ამბობს, რომ მისი მიზანია გაათავისუფლოს 200-ზე მეტი მძევალი და ასევე გაანადგუროს "ჰამასი", რომელიც ისრაელს, შეერთებულ შტატებს და დასავლეთის დიდ ნაწილს ტერორისტულ ორგანიზაციად ჰყავს გამოცხადებული.
Facebook Forum