საერთაშორისო უფლებადამცველი ორგანიზაციის „ფრიდომ ჰაუსის“ ახალი ანგარიშის თანახმად, საქართველო კვლავ ნაწილობრივ თავისუფალ ქვეყნად რჩება. ყოველწლიური ანგარიშის “თავისუფლება მსოფლიოში 2017” მიხედვით, საქართველოს საერთო მაჩვენებელი 100 შესაძლებლიდან 64-ია. ორგანიზაციის შეფასების სისტემის მიხედვით, საქართველოს იგივე ქულა ჰქონდა მინიჭებული გასულ წელსაც.
გლობალური თავისუფლებების მხრივ, მდგომარეობა მთელ მსოფლიოში უკვე 11 წელია ზედიზედ უარესდება - აცხადებს ორგანიზაცია. დემოკრატიულ სახელმწიფოებში პოპულისტური და ნაციონალისტური ძალები ძლიერდებიან. იმ ქვეყნებშიც კი, რომლებიც, ანგარიშის მიხედვით, თავისუფალი სახელმწიფოების კატეგორიაში არიან, უკანდახევაა პოლიტიკური უფლებების, სამოქალაქო თავისუფლებების, ან - ორივე მიმართულებით. მათ შორის არიან: ბრაზილია, ჩეხეთი, საფრანგეთი, უნგრეთი, პოლონეთი, სერბეთი, ამერიკის შეერთებული შტატები, ტუნისი და მრავალი სხვა.
195 სახელმწიფოს შორის მხოლოდ 87 (45%) შეფასდა, როგორც თავისუფალი. 59 ქვეყანა (30%) ნახევრად თავისუფალთა სიაში მოხვდა. 49 (25%) სახელმწიფოს კი “ფრიდომ ჰაუსი” თავისუფლად არ მიიჩნევს.
