“ეს აბსოლუტურად მცდარია. პირველი შემთხვევა არაა, რომ რუსეთის დაზვერვის სამსახურების ასეთ ბრალდებებს აბსურდად ვაფასებთ“, - ამბობს ამერიკის სახელმწიფო დეპარტამენტის პრესსპიკერი „ამერიკის ხმის“ კითხვაზე პასუხად.
რუსეთის სამხედრო დაზვერვის ინფორმაციაზე დაყრდნობით, რუსულმა მედიამ 11 სექტემბერს გაავრცელა ინფორმაცია, თითქოს შეერთებული შტატები ეუთოს "დემოკრატიული ინსტიტუტებისა და ადამიანის უფლებების ოფისთან (ODIHR) ერთად საქართველოს არჩევნებში ჩარევას აპირებს. რუსული სამხედრო დაზვერვა ირწმუნება, რომ ამერიკა ცდილობს ხელი შეუშალოს არჩევნებში „ქართული ოცნების“ გამარჯვებას და ამისთვის ეუთო/ოდირთან თანამშრომლობას აპირებს.
„ტასი“ წერს, რომ რუსული უსაფრთხოების სამსახურების ცნობით, საპარლამენტო არჩევნებამდე 10-20 დღით ადრე ეუთოს სადამკვირვებლო მისია გამოაქვეყნებს შუალედურ დასკვნას, რომელშიც გაკეთებული იქნება დასკვნა, რომ ქვეყანაში არაა სამართლიანი და თავისუფალი არჩევნების ჩასატარებლად საჭირო გარემო. მას შემდეგ კი, რაც შედეგები გამოქვეყნდება, მისია განცხადებას გააკეთებს, რომ საარჩევნო პროცესი დემოკრატიულ ნორმებს არ შეესაბამებოდა.
ამერიკის სახელმწიფო დეპარტამენტში ამ ბრალდებას სრული სიყალბე უწოდეს და თქვეს, რომე ეს პირველი ასეთი „აბსურდული“ განცხადება ნამდვილად არ არის.
„ამერიკის შეერთებულ შტატებს სურს მხარი დაუჭიროს დემოკრატიას და თავისუფალ და სამართლიან არჩევნებს მთელ მსოფლიოში. რუსეთია ის ქვეყანა, რომელიც დემოკრატიული უკრაინის წინააღმდეგ ომს აწარმოებს და აგრძელებს საქართველოს 20 %-ის ოკუპაციას“, - ამბობს სახელმწიფო დეპარტამენტის პრესსპიკერი „ამერიკის ხმისთვის“ გაგზავნილ პასუხში.
"ყველა, ვისაც კი რუსეთის უსაფრთხოების სამსახურების სჯერა, თავს ისულელებს", - ასე შეაფასა რუსეთის მხრიდან ამერიკული ორგანიზაციების დადანაშაულება საქართველოს არჩევნებზე გავლენის მოხდენის თაობაზე ცოტა ხნის წინ ამერიკის შეერთებული შტატების სახელმწიფო მდივნის თანაშემწემ ევროპისა და ევრაზიის საკითხებში - ჯიმ ო'ბრაიენმა. სახელმწიფო დეპარტამენტის მაღალჩინოსანი ამბობს, რომ არასამთავრობო ორგანიზაციების და დამოუკიდებელი მედიის ფუნქციონირების შეზღუდვა წინასაარჩევნოდ, თავისთავად გამოიწვევს რუსეთის დომინირებას საინფორმაციო სივრცეში.
"თუკი მთავრობა წარმატებული იქნება, რომ ლამის მთლიანად უარყოს ყველა ამ ჯგუფისთვის რესურსებზე წვდომა, ინფორმაციის მხოლოდ რუსული წყაროები გადარჩებიან. ასე რომ, რაც უნდა ყოფილიყო აქამდე, რასაც მთავრობა [ახლა] აკეთებს, რუსეთს ეს საქართველოს საინფორმაციო სივრცეში დომინირებას ბევრად უფრო უადვილებს", - უთხრა რამდენიმე კვირის წინ "ამერიკის ხმას" ჯიმ ო'ბრაიენმა.
12 სექტემბერს ეუთოს "დემოკრატიული ინსტიტუტებისა და ადამიანის უფლებების ოფისის" (ODIHR) არჩევნებზე სადამკვირვებლო მისია ოფიციალურად შეუდგა მუშაობას, რათა მონიტორინგი გაუწიოს 26 ოქტომბრის საპარლამენტო არჩევნებს. მისია არჩევნებზე დასაკვირვებლად საქართველოს მთავრობამ ოფიციალურად მიიწვია.
მისიის წარმომადგენლებს შორის არის 12 საერთაშორისო ექსპერტი და 30 გრძელვადიანი დამკვირვებელი, რომლებიც 19 სექტემბრიდან მთელი საქართველოს მასშტაბით გადანაწილდებიან. ამასთანავე, არჩევნებამდე რამდენიმე დღით ადრე მათ დაემატება ODIHR-ის მიერ მოწვეული 350 მოკლევადიანი დამკვირვებელი.
"მისია შეაფასებს არჩევნების შესაბამისობას ეუთოს მიმართ ვალდებულებებსა და დემოკრატიული არჩევნებისათვის დადგენილ სხვა საერთაშორისო სტანდარტებთან მიმართებაში, აგრეთვე მის შესაბამისობას ეროვნულ კანონმდებლობასთან. დამკვირვებლები არჩევნების ყველა ასპექტს დააკვირდებიან არჩევნების დღემდე და შემდეგ", - ვკითხულობთ მისიის მიერ 12 სექტემბერს გავრცელებულ განცხადებაში. არჩევნების შემდეგ დღეს საერთაშორისო სადამკვირვებლო მისია დაკვირვების წინასწარ შედეგებს წარუდგენს საზოგადოებას. საარჩევნო პროცესის შეფასების საბოლოო ანგარიში, რეკომენდაციების ჩათვლით, ტრადიციულად, საარჩევნო პროცესის დასრულებიდან რამდენიმე თვეში ქვეყნდება.
2022 წლის იანვარში ამერიკის სახელმწიფო დეპარტამენტმა გამოაქვეყნა იმ უმთავრესი დეზინფორმაციული და პროპაგანდისტულლი ნარატივების ჩამონათვალი, რომლებსაც კრემლი ათწლეულებია იყენებს. მათი მიზანი კი ანტიამერიკული განწყობების გაძლიერებასთან ერთად, ძირითადად, ლეგიტიმური და დამოუკიდებელი საპროტესტო მოძრაობებისა თუ მედიასაშუალებების დისკრედიტაციაა. ხუთ ასეთ წამყვან თემას შორის ერთ-ერთი „საზოგადოებრივი მოძრაობების ამერიკის მიერ დაფინანსებულ ფერად რევოლუციებად“ წარმოჩენაა.
„სწორედ ეს დეზინფორმაციული ნარატივი ერთ-ერთი ყველაზე განგრძობითი ნარატივია, რომელსაც რუსეთი იყენებს ამერიკის დისკრედიტაციისთვის და რეპუტაციის შელახვისთვის. ასევე, ადგილობრივი სამოქალაქო საზოგადოების ორგანიზაციების დისკრედიტაციისთვის. ამ ნარატივით ხალხს ეუბნებიან, რომ არ არსებობს ასეთი დემოკრატიული მოძრაობა, ხალხის დამოუკიდებელი გაერთიანება, რომელიც რაღაცას აპროტესტებს, არამედ არსებობს შეერთებული შტატების მიერ ორგანიზებული გადატრიალება და რევოლუცია“, - ხსნიდა დეზინფორმაციის მკვლევარი ეთო ბუზიაშვილი "ამერიკის ხმასთან" ინტერვიუში.
