რუსეთის ბლოკადის მიუხედავად, ოდესიდან სატვირთო გემი გავიდა

ასევე ნახეთ:

პუტინი ერდოღანთან საუბრისას მარცვლეულის შეთანხმების თაობაზე თავის პოზიციას იმეორებს

კიევმა განცხადება ე.წ ჰუმანიტარული დერეფნის გახსნაზე 8 აგვისტოს გააკეთა. უკრაინა ოდესის გარდა, ქვეყნის დატოვების საშუალებას შავი ზღვის ჩერნომორსკის და პივდენნის პორტებში გაჭედილ გემებსაც აძლევს.

რუსეთს ამ ფაქტზე ჯერ კომენტარი არ გაუკეთებია. მოსკოვს არც მანამდე უთქვამს არაფერი უკრაინის ჰუმანიტარული დერეფნის ინიციატივაზე. თუმცა, მანამდე განაცხადა, რომ ნებისმიერი გემი, რომელიც უკრაინის შავი ზღვის პორტებში გადააადგილდება, რუსეთის მიერ აღქმული იქნება, როგორც სამხედრო ტვირთის პოტენციური გადამზიდი.

13 აგვისტოს რუსეთის სამხედრო გემმა გამაფრთხილებელი გასროლით შეაჩერა სატვირთო გემი, რომელიც უკრაინაში, მდინარე დუნაიზე, იზმირის პორტს უახლოვდებოდა. გემი მხოლოდ მას შემდეგ გაატარეს, რაც მასზე რუსეთის არმიის წარმომადგენლები დაუშვეს და ჩხრეკის უფლება მისცეს.

ამ დრომდე, ჰონგ-კონგის დროშით მოძრავი სატვირთო გემი Joseph Schulte პირველი კომერციული გემია, რომელმაც უკრაინის შავი ზღვის პორტი ბოლო ერთი თვის განმავლობაში დატოვა. რუსეთმა ერთი თვის წინ, 17 ივლისს განაცხადა, რომ ექსპორტზე გაეროს და თურქეთის შუამავლობით მიღწეულ მარცვლეულის შეთანხმებას ტოვებდა.

"შავი ზღვის ინიციატივის" სახელით ცნობილი შეთანხმება საშუალებას აძლევდა კიევს, შავი ზღვის პორტებიდან მსოფლიოსთვის კრიტიკულად მნიშვნელოვანი საექსპორტო პროდუქცია გაეტანა. საუბარია უკრაინულ მარცვლეულზე, სხვა სურსათზე და ასევე სასუქზე. გაერომ მოსკოვის გადაწყვეტილება გააკრიტიკა და თქვა, რომ ეს "დიდი დარტყმაა გასაჭირში მყოფი ადამიანებისთვის".

მას შემდეგ, კრემლმა გაზარდა საჰაერო იერიშები ოდესაზე და მის საპორტო ინფრასტრუქტურაზე. რუსეთის დრონებმა ღამით, 16 აგვისტოს გათენებამდეც დაბომბეს "დუნაის ერთ-ერთი პორტი, დააზიანეს რა საწყობები და ხორბლის საცავები" - აცხადებს ოდესის სამხედრო ადმინისტრაციის მეთაური ოლეგ კიპერი. მისი თქმით, უკრაინამ ოდესის თავზე მარტო ამ ერთ ღამეში, რუსეთის 11 დრონი ჩამოაგდო.