ამერიკული ფარმაცევტული კომპანია „ფაიზერი“ და მისი გერმანული პარტნიორი „ბიონტეკი“ შეერთებული შტატების სურსათისა და მედიკამენტების ადმინისტრაციას ავტორიზაციას სთხოვენ, რომ მათი ერთობლივი კოვიდ-19 საწინააღმდეგო ვაქცინის გამოყენება 5 წლამდე ბავშვებშიც დაიწყოს.
კომპანიები ამერიკის მარეგულირებელს სთხოვენ გადაუდებელი გამოყენების ნებართვა გასცეს „ფაიზერის“ ვაქცინაზე იმისთვის, რომ ექვსი თვის ასაკიდან 5 წლამდე ბავშვებს ვაქცინის ორჯერადი დაბალი დოზა დაენიშნოთ. ამ თხოვნით ვაქცინის მწარმოებლები მაინც მიმართავენ მედიკამენტების ადმინისტრაციას, მიუხედავად იმისა, რომ დეკემბერში განაცხადეს, რომ ვაქცინამ 2-4 წლის ასაკის ბავშვებში იმუნური პასუხი არ გამოიწვია, რაც ძალიან ჰგავდა თინეიჯერებში ჩატარებულ კვლევებს, რის შემდეგაც კომპანიამ მესამე დოზის გაკეთების გადაწყვეტილება მიიღო.
ჯანდაცვის ექსპერტებმა „ფაიზერს“ და „ბიონტექს“ მოუწოდეს მაინც მიმართონ მარეგულირებელს ორჯერადი აცრის თაობაზე და პარალელურად მესამე აცრის კვლევების შედეგებს დაელოდონ. 5 წლამდე ბავშვებისთვის ვაქცინა ხელმისაწვდომი თებერვლის ბოლოს შეიძლება გახდეს იმ შემთხვევაში, თუ მას სურსათისა და მედიკამენტების ადმინისტრაცია და აშშ-ის დაავადებათა კონტროლისა და პრევენციის ცენტრები გადაუდებელი მოხმარების ავტორიზაციას მისცემენ.
ამ ფონზე, აშშ-ში დაფუძნებულმა კიდევ ერთმა ფარმაცევტულმა კომპანიამ „ნოვავაქსი“, ორშაბათს განაცხადა, რომ მანაც მიმართა სურსათისა და მედიკამენტების ადმინისტრაციას თხოვნით, რომ გადაუდებელი გამოყენებისთვის მისი ვაქცინაც დაამტკიცოს.
