საქართველოში Covid-19-ით მე-6 პაციენტი დაიღუპა

საქართველოში Covid-19-ის გავრცელების, პირველი ლაბორატორიულად დადასტურებული შეხთხვევიდან, ზუსტად ორი თვის თავზე, რიგით მე-6 პაციენტი გარდაიცვალა. 83 წლის მამაკაცი პირველ საუნივერსიტეტო კლინიკაში მკურნალობდა. კლინიკის დირექტორის ლევან რატიანის თქმით, გარდაცვლილს ქრონიკული პათოლოგიები ჰქონდა:

„მამაკაცი, რომელზეც გუშინ ვამბობდი, რომ იყო მძიმე მდგომარეობაში, სამწუხაროდ, დღეს დილით გარდაიცვალა. ასაკით 83 წლის იყო, ქრონიკული პათოლოგიებით – გულის უკმარისობა, მოციმციმე არითმია. ექოსკოპიური კვლევის შედეგად, ყველა სარქვლის ნაკლოვანება ჰქონდა. სამწუხაროდ, ყველა ღონისძიება აღმოჩნდა უშედეგო“ – აღნიშნა ექიმმა ლევან რატიანმა.

ახალი კორონავირუსით ინფიცირებული პირველი პაციენტი საქართველოში 4 აპრილს გარდაიცვალა. 79 წლის ქალი პირველ საუნივერსიტეტო კლინიკაში მკურნალობდა და მისი მდგომარეობა კრიტიკული იყო. იგი კლინიკაში 31 მარტს შეიყვანეს.

მეორე პაციენტი, 81 წლის ქალი, 5 აპრილს ასევე თსსუ-ს პირველ საუნივერსიტეტო კლინიკაში გარდაიცვალა. მანამდე კი თბილისის ზღვის ჰოსპიტალში მკურნალობდა.

მესამე 86 წლის ქალი, 7 აპრილს გარდაიცვალა. ის ორი კვირის განმავლობაში თბილისის ინფექციური საავადმყოფოს პაციენტი იყო და რეანიმაციაში იწვა.

მეოთხე გარდაცვლილი პაციენტი ქობულეთის კლასტერიდან იყო. კორონავირუსით ინფიცირებული ბათუმში, კლინიკა მედალფაში 8 აპრილიდან მკურნალობდა. ის 13 აპრილიდან მართვით სუნთქვაზე იმყოფებოდა.

22 აპრილს გარდაცვლილი კორონავირუსით ინფიცირებული რიგით მე-5 პაციენტი პირველ საუნივერსიტეტო კლინიკაში 2 კვირის განმავლობაში მკურნალობდა. 68 წლის მამაკაცი ბოლნისის კლასტერიდან იყო და ასევე კრიტიკულ მდგომარეობაში იმყოფებოდა

დღესვე, ოკუპირებულ აფხაზეთში, გუდაუთის ჰოსპიტალში, კორონავირუსით 95 წლის პაციენტი გარდაიცვალა. ქალბატონს Covid-19 11 აპრილს დაუდასტურეს, თუმცა, ის სახლიდან სამედიცინო დაწესებულებაში გადაყვანის წინააღმდეგი იყო. ჯანმრთელობის მდგომარეობის გართულების შემდეგ, ჰოსპიტალში 20 აპრილს გადაიყვანეს, თუმცა მისი გადარჩენა ვეღარ მოხერხდა.