შეერთებული შტატების სახელმწიფო მდივანი ჯონ კერი ლონდონში იმყოფება და საერთაშორისო ანტიკორუფციულ სამიტში იღებს მონაწილეობას. გლობალურ სამიტს დიდი ბრიტანეთის პრემიერ-მინისტრი დევიდ კამერონი მასპინძლობს.
“კორუფციის ბოროტება მსოფლიოს ყველა კუთხეში აღწევს. ის ჩვენს წინაშე არსებული ყველაზე გადაუდებელი პრობლემების გულშია, დაწყებული ეკონომიკური გაურკვევლობით, ენდემური სიღარიბით, თუ მუდმივად თანმდევი რადიკალიზაციით და ექსტრემიზმით დამთავრებული” - განაცხადა დღეს პრემიერმა კამერონმა. სამიტი საზოგადოების ყველა ფენის კორუფციასთან ბრძოლის გაძლიერებას ისახავს მიზნად. მას მსოფლიოს მრავალი ქვეყნის ოფიციალური წარმომადგენელი ესწრება, რომელთა შორის ავღანეთის, კოლუმბიის და ნიგერიის ლიდერებიც არიან.
