პრეზიდენტ ტრამპის ნომინანტი უზენაესი სასამართლოს მოსამართლის პოსტზე მის წინააღმდეგ ბრალდებებს კატეგორიულად უარყოფს. ბრეტ კავანა აცხადებს, რომ არ აპირებს უმაღლესი სასამართლოს წევრობაზე უარის თქმას.
ორშაბათს, ტელეკომპანია “ფოქსთან” ინტერვიუში კავანამ განაცხადა: “არასოდეს მიმიყენებია სექსუალური ხახიათის შეურაცხყოფა არავისთვის. არც სკოლაში და არც არასდროს”. უზენაესი სასამართლოს მოსამართლეობის კანდიდატი ამბობს, რომ არ დაუშვებს ცრუ ბრალდებების გამო ნომინაციის პროცედურის დატოვებას.
“არსად წასვლას არ ვაპირებ” - განაცხადა კავანამ ინტერვიუს დასასრულს და კანონმდებლებს პროცედურის სამართლიანად წარმართვისკენ მოუწოდა, რათა მან საკუთარი “ღირსების დაცვა და სახელის გასუფთავება” შეძლოს.
ნომინანტი დღეს სენატის იურიდიული კომიტეტის წინაშე კვლავ წარსდგება. სენატში მის ერთ-ერთ ბრალმდებელს, ქრისტინ ბეილი ფორდსაც მოუსმენენ, რომელიც აცხადებს, რომ კავანამ ის 1982 წელს სექსუალურად შეავიწროვა.