რუსეთის საზღვრისპირა ბელგოროდის რაიონი, კრემლის მტკიცებით, კვლავ უკრაინელთა იერიშის სამიზნე გახდა. ინფორმაციას ამის შესახებ ოლქის გუბერნატორი ავრცელებს. ვიაჩესლავ გლადკოვი ამბობს, რომ აფეთქებების დროს ორი ადამიანი დაიღუპა და ორიც დაშავდა.
რუსეთის ოფიციალური პირები აცხადებენ, რომ იერიშები ბელგოროდზე უკრაინამ სამხედრო თვითმფრინავებიდან მიიტანა. გლადკოვი სოციალურ ქსელ „ტელეგრამში“ წერს, რომ ბომბები ქალაქ მასლოვა პრისტანში ჩამოვარდა სავალ გზაზე, რა დროსაც გზაზე მოძრავი ავტომობილები და მასში მსხდომი ადამიანები დაშავდნენ.
„ერთ-ერთში ორი ქალი იმყოფებოდა, რომლებიც მიყენებული ჭრილობების შედეგად ადგილზე დაიღუპნენ“, - ამბობს რუსი გუბერნატორი. რუსეთის ოფიციალური პირების ცნობით, დაბომბვების დროს დაზიანდა რამდენიმე საცხოვრებელი სახლიც.
Your browser doesn’t support HTML5
ბელგოროდის ბრძოლა - ვინ არიან რუსები, რომლებიც პუტინის წინააღმდეგ იბრძვიან
დამოუკიდებელი წყაროებით ინფორმაციის გადამოწმება ამ დროისთვის ვერ მოხერხდა - ამბობს სააგენტო „როიტერი“.
კიევმა ბრალდებები უარყო. უკრაინის ხელისუფლება ამბობს, რომ ბელგოროდში სამხედრო ოპერაციას რუსი მოხალისე მებრძოლები ატარებენ.
უკრაინელი ბავშვები
გასული ღამე უკრაინისთვის შედარებით მსუბუქი იყო, საჰაერო სირენების ხმა არ ყოფილა ყველა ქალაქში, თუმცა დედაქალაქი კიევი რუსეთის სამიზნედ კვლავ რჩება. თავდაცვის ძალებმა კიევისკენ მიმართული 30-ზე მეტი რაკეტა, ამერიკული „პატრიოტებითა“ და სხვა საჰაერო თავდაცვითი სისტემებით გაანადგურეს.
Your browser doesn’t support HTML5
თავდასხმა კრემლზე - „პესკოვი ცრუობს“
რუსეთი უკვე 15 თვეა უკრაინაში სრულმასშტაბიან ომს აწარმოებს, მოსკოვი უარყოფს ბრალდებებს ომის დანაშაულთან დაკავშირებით და ამბობს, რომ რუსული ჯარის სამიზნე მშვიდობიანი მოსახლეობა არ არის. თუმცა, ფაქტები ცხადყოფს, რომ რუსეთის სამიზნე ხშირად სამოქალაქო ინფრასტრუქტურა და მშვიდობიანი მოქალაქეები არიან.
უკრაინის გენერალური პროკურატურის განცხადებით, ომის დანაშაულებისა და ჩადენილი სისასტიკეების შესახებ 90 000-მდე საქმე უკვე აღწერილი და დოკუმენტირებულია. გარდა ამისა, ათასობით ადამიანი მათ შორის ბავშვები, უკრაინიდან რუსეთში გაიტაცეს, რის გამოც საერთაშორისო სისხლის სამართლის სასამართლომ პუტინის დაკავების ორდერი გასცა.