დღეს, იაპონიის ჩრდილოეთ კუნძულ ჰოკაიდოზე 6.7 ბალის სიმძლავრის მიწისძვრა მოხდა. მიწისძვრამ რამდენიმე ადგილზე მეწყერი გამოიწვია, რის გამოც სოფლებში ასობით სახლი დაინგრა და ნაწილი მიწისქვეშ მოყვა.
დაღუპულთა რაოდენობა, ბოლო მონაცემებით 7 ადამიანს შეადგენს. თუმცა, ათობით ადამიანი ისევ დაკარგულია, სამაშველო სამუშაოები გრძელდება და მსხვერპლის რაოდენობა, სავარაუდოდ გაიზრდება. ამ დროისთვის 140 დაშავებულია და დაახლოებით 40 ადამიანს ისევ ეძებენ.
ჰოკაიდოს კუნძულის მთელ მოსახლეობას, 3 მილიონ ადამიანს ელექტროენერგია გამოერთო. შეწყდა სარკინიგზო მიმოსვლა და დაიხურა აეროპორტი.
პრემიერ-მინისტრ შინზო აბეს თქმით, ადგილზე მობილიზებულია 25 ათასამდე ჯარისკაცი. კუნძულზე მდებარე ბირთვული სადგურის სამივე რეაქტორი მიწისძვრის დროს გამორთული იყო, რადგან მასზე უსაფრთხოების ზომების შემოწმება მიმდინარეობდა.