ბრიდლოვი: ეს კრიზისი ქართველი ხალხის ინტერესში არ შედის, მისით მხოლოდ კრემლი სარგებლობს

ახლო აღმოსავლეთის ინსტიტუტის "ევროპის ინიციატივის" თავმჯდომარე, თადარიგის გენერალი ფილიპ ბრიდლოვი ამბობს, რომ მიმდინარე მოვლენები ქართველი ხალხის ინტერესებში არ შედის და ერთადერთი მხარე, რომელიც ამ კრიზისით სარგებლობს - კრემლია. ის ამბობს, რომ კრიზისში დაპირისპირებულ რომელიმე ძალას არ ემხრობა, თუმცა ყველას მოუწოდებს საერთო ღირებულებები გაიხსენონ, დიალოგი განაახლონ და ქართველი ხალხის ინტერესი ყველაფერზე მაღლა დააყენონ. ფილიპ ბრიდლოვს "ამერიკის ხმის" ჟურნალისტი ია მეურმიშვილი ესაუბრა.

გენერალო, დიდი მადლობა ინტერვიუსთვის დრო რომ გამონახეთ. ბოლო პერიოდში საქართველოში მნიშვნელოვანი მოვლენები მოხდა. როგორ ხედავთ სიტუაციას აქედან და რას ფიქრობთ მიმდინარე მოვლენებზე?

უპირველეს ყოვლისა, ია, მადლობა მოწვევისთვის და იმის საშუალების მოცემისთვის, რომ რამდენიმე სიტყვა გითხრათ იმ ქვეყანაზე, რომელზეც ძალიან ვზრუნავ. ჩემი, როგორც ნატოს ჯარების მთავარსარდლის და ავღანეთში ძალების მეთაურის საქმიანობის განმავლობაში, გავიცანი და ძალიან დავაფასე ქართული ძალები, ბევრჯერ ვიყავი ქვეყანაში. მიყვარს ქართველი ხალხი და ის, რისიც მათ სჯერათ შავი ზღვის და მსოფლიოს ამ ნაწილში, რომელიც გულწრფელად რომ ვთქვათ, რთული სამეზობლოა. ჩემთვის მტკივნეულია იმის ყურება, რაც საქართველოში ხდება. ვლოცულობ იმისთვის, რომ ქვეყანამ მონახოს გამოსავალი ამ ბრძოლებიდან, რადგან ის დიადი ერია და გეოსტრატეგიული თვალსაზრისით, მსოფლიოს ამ ნაწილში, ის ჩვენთვის ძალზე მნიშვნელოვანია.

ალბათ, ნახეთ, რომ მთავრობამ დააპატიმრა ქვეყნის ერთ-ერთი მთავარი ოპოზიციური ფიგურა ნიკა მელია, რამაც შეერთებულ შტატებში აღშფოთება გამოიწვია. გაკეთდა ბევრი უკმაყოფილო განცხადება ქვეყნის დემოკრატიულ მიმართულებასთან დაკავშირებით. როგორ აფასებთ თქვენ მელიას დაკავებას?

ამერიკაში პოლიტიკაში ჩართვისგან თავს ვიკავებ. არ ვფიქრობ, გენერლები პოლიტიკაში უნდა მონაწილეობდნენ. აქაც კონკრეტულს ვერაფერს გეტყვით, მაგრამ რამდენიმე მოსაზრებას გაგიზიარებთ. პირველი არის ის, რომ ჩვენ უნდა ვაღიაროთ, რომ ქართველი ხალხის, მთავრობისა და სხვა ლიდერების ერთიანობა ჩვენთვის ძალიან მნიშვნელოვანია. რომელიმე მხარეს არ მივემხრობი, მაგრამ ვიტყვი, რომ ჩრდილოეთით თქვენს დიდ მეზობელს სურს იხილოს არეულობა, დაქსაქსულობა, დემოკრატიის ისე გათელვა, როგორც ამას თავად აკეთებენ საკუთარ დიდ ქვეყანაში. ჩვენ გვსურს დავინახოთ, რომ ყველა მხარე განაგრძობს დიალოგს იმისთვის, რომ ერთად იპოვონ გამოსავალი ამ პრობლემების გადასალახად და თავიდან აიცილონ ის, რაც ჩრდილოელ მეზობელს სურს.

ჩემი აზრით, ბევრი რამაა ისეთი, რასაც ქვეყნის გაერთიანება შეუძლია. ისინი ნატოსა და დასავლეთში გაწევრიანებისთვის იბრძოდნენ. ავღანეთში და სხვაგან, ნატოს ძალებთან მუშაობის დროს, საქართველოსთან დაკავშირებით შთამბეჭდავი ყოველთვის იყო ის, რომ ქართველები ჩვენს ღირებულებებს იზიარებენ. ახლა მხარეებს პოლიტიკური პრობლემები აქვთ, მაგრამ მათ საერთო ღირებულებები აერთიანებთ. ვფიქრობ, საქართველოში ყველა ძალა იზიარებს ამ ღირებულებებს და იმას, თუ რა არის კარგი ქართველი ხალხისთვის. ამიტომ, ყველას მოვუწოდებ გაიხსენონ რა გვაერთიანებს და ფოკუსი ამაზე გააკეთონ. ფოკუსი დიალოგზე გააკეთონ და ამ დიად ქვეყანაში ერთობა დააბრუნონ.

სწორედ ამის კითხვას ვაპირებდი ახლა, რას ფიქრობთ, რა შეიძლება იყოს გამოსავალი იმ პირობებში, როცა მხარეებს შორის დიალოგის პერსპექტივა ამ ეტაპზე არ ჩანს. მხარეებს თითქოს ერთმანეთის საუბრის არ ესმით.

შეიძლება ვთქვა, რომ შეერთებულ შტატებშიც იგივე პრობლემა გვაქვს? ჩვენ დიადი ქვეყანა ვართ და ამ პოლიტიკური არეულობიდან გამოვალთ. ვფიქრობ, რომ საქართველოც დიადი ქვეყანაა. მათ მხოლოდ იმ ღირებულებებზე რომ გააკეთონ ფოკუსირება და გამონახონ ერთმანეთთან საერთო თემები, საქართველოც გამოვა ამ სიტუაციიდან.

თქვენი აზრით, ამ სიტუაციას შეიძლება ჰქონდეს გავლენა ამერიკა-საქართველოს ურთიერთობაზე?

იმედი მაქვს, არა. იმის მჯერა, რომ საქართველოს, ქართველი ხალხის, ქართული ჯარის მიმართ ორპარტიული მხარდაჭერა არსებობს. ჩვენ მადლიერები ვართ იმისთვის, რასაც საქართველოს ჯარისკაცები აკეთებენ ჩვენთვის. სიმართლე გითხრათ, ამერიკაშიც ბევრი პოლიტიკური პრობლემა გვაქვს და ვხედავთ, რომ საქართველოშიც მსგავსი პროცესები ხდება. მჯერა, რომ ამერიკა ხედავს ყველაფერ კარგს, საქართველოს მოუწოდებს და დაეხმარება ამ გამოწვევის გადალახვაში.

ვაშინგტონში საქართველოში მიმდინარე პოლიტიკურ კრიზისს აფასებენ