საქართველოში ევროკავშირის ახალი ელჩი პაველ ჰერჩინსკი მოვალეობის შესრულებას შეუდგა. ევროკავშირის წარმომადგენლობა მის პირველ მიმართვას ავრცელებს:
"საქართველოში ევროკავშირის ელჩობა ჩემთვის პატივი და ასევე დიდი პასუხისმგებლობა არის. ამ თანამდებობაზე დანიშვნა ევროკავშირი-საქართველოს ურთიერთობების ერთ-ერთ ყველაზე მნიშვნელოვან მომენტს ემთხვევა. ევროპული საბჭოს ისტორიული გადაწყვეტილება საქართველოსთვის ევროპული პერსპექტივის მინიჭების შესახებ ახალ რეალობას ქმნის.
ჩემს გუნდთან ერთად დაუღალავად ვიშრომებ ევროკავშირისკენ მიმავალ გზაზე საქართველოს მხარდასაჭერად. ამ პროცესში წვლილის შეტანის შესაძლებლობა უზარმაზარი პრივილეგიაა".
ასევე ნახეთ: საქართველოს და უკრაინის პირველი დიპლომატების შეხვედრადღეს, 5 სექტემბერს პრეზიდენტმა სალომე ზურაბიშვილმა ევროკავშირის ელჩს რწმუნებათა სიგელები გადასცა. ცერემონია ორბელიანების სასახლეში გამართა. პრეზიდენტის ადმინისტრაციის ცნობით, საუბარი შეეხო საქართველოს ევროკავშირში ინტეგრციის პროცესს. საქართველოს პრეზიდენტმა ევროკავშირის ახალ ელჩს წარმატებული საქმიანობა უსურვა.
საქართველოში ევროკავშირის წარმომადგენლობაში მუშაობის დაწყებამდე, ელჩი ჰერჩინსკი ბრიუსელში ევროკავშირის საგარეო ქმედებათა სამსახურის ერთიანი უსაფრთხოებისა და თავდაცვის პოლიტიკის და კრიზისებზე რეაგირების დირექტორატს ხელმძღვანელობდა. მანამდე მას ბრიუსელში პოლიტიკისა და უსაფრთხოების კომიტეტში პოლონეთის ელჩის, ნიუ-იორკში გაეროში პოლონეთის მუდმივი წარმომადგენლის მოადგილის და პოლონეთის საგარეო საქმეთა სამინისტროში ევროკავშირის დეპარტამენტის დირექტორის მოადგილის თანამდებობები ეკავა.