თბილისში, „საარჩევნო კომპასი საქართველო 2024-ის" პრეზენტაციაზე მყოფმა ევროკავშირის ელჩმა პაველ ჰერჩინსკიმ ჟურნალისტებს უთხრა, რომ საქართველოს ხელისუფლებასთან მაღალი დონის შეხვედრები შეჩერდება.
„უკვე მიმდინარე წლის ივნისში ჩვენ გვქონდა შიდა დისკუსია ევროკავშირის წევრი ქვეყნების წარმომადგენლებთან იმაზე, რა მიდგომა უნდა გვქონდეს საქართველოს მთავრობის ქცევის მიმართ. ამ ქცევას ჩვენ განვიხილავთ, როგორც არამეგობრულს ევროკავშირისადმი. ჩვენ ვიმსჯელეთ, როგორ უნდა მივდგომოდით ანტიდასავლურ და ანტიევროპულ ნარატივებს, პროპაგანდას, შეთქმულების თეორიებს და გადავწყვიტეთ, როგორც ევროკავშირის ინსტიტუტებმა, აღარ გვქონდეს უმაღლესი დონის კონტაქტები საქართველოს მოქმედ მთავრობასთან. სწორედ ამიტომაა, რომ ბოლო თვეებში არ გამართულა უმაღლესი დონის ვიზიტები, ვგულისხმობ ჩემი ხელმძღვანელების ევროკავშირიდან ვიზიტებს საქართველოში. ასევე, არ ყოფილა საქართველოს მთავრობის წარმომადგენლების ვიზიტები ბრიუსელში. ევროკავშირის ინსტიტუტებმა გადავწყვიტეთ, შევაჩეროთ ყველა მაღალი დონის შეხვედრა საქართველოს მთავრობის წარმომადგენლებთან“, - თქვა ჰერჩინსკიმ.
ის ასევე გამოეხმაურა შეკითხვას საქართველოს მთავრობის წევრებისთვის სანქციების დაწესების შესაძლებლობაზე ევროკავშირის მიერ. ჰერჩინსკის თქმით, მიუხედავად იმისა, რომ ევროკავშირი [და] ამერიკის შეერთებული შტატები თანამოაზრეები, პარტნიორები არიან, აქვთ საკითხების მიმართ კოორდინაცია, მათი პოზიციები იდენტური არაა, "ეს საკმაოდ ბუნებრივია", პაველ ჰერჩინსკის სიტყვებით, ევროკავშირის მიერ სანქციების დაწესება მოითხოვს წევრი ქვეყნების ერთსულოვნებას. "ეს ნიშნავს, რომ 27-ვე წევრი სახელმწიფო უნდა შეთანხმდეს".
ასევე ნახეთ: ექსკლუზივი: ბაიდენის მიღებაზე კობახიძის მიწვევა გაუქმებულია"ამჟამად არსებობს სანქციების სამომავლოდ დაწესების შესაძლებლობა იმ შემთხვევაში, თუ არჩევნებთან დაკავშირებით საქმე რეალურად არასწორად წავა. ასე რომ, სანქციები არის ერთ-ერთი ვარიანტი, რაც მაგიდაზეა. თუმცა. ამ მომენტისთვის საქართველოს წარმომადგენლების მიმართ არანაირი სანქციების დაწესება არ განიხილება“, - თქვა პაველ ჰერჩინსკიმ.
დასავლეთის კრიტიკა „ქართული ოცნების“ ხელისუფლების მისამართით მას შემდეგ გამძაფრდა, რაც მმართველმა პარტიამ ე.წ. აგენტების კანონი მიიღო. კანონი აშშ-ის, ევროკავშირისა და წევრი ქვეყნების აბსოლუტური უმრავლესობის განცხადებით, აშორებს საქართველოს ევროპის კავშირში გაწევრებას.
ევროკომისიის მიერ ჯერ კიდევ ივნისში გამოქვეყნებულ დოკუმენტში საუბარი იყო ნაბიჯებზე, რომლებიც ევროკავშირმა შეიძლება გადადგას, თუ საქართველოში პოლიტიკური ვითარება არ გაუმჯობესდება.
ევროკავშირის ელჩმა 20 სექტემბერს იმედი გამოთქვა, რომ საქართველოში 26 ოქტომბრის საპარლამენტო არჩევნებში გამარჯვებული ხელისუფლება, ვინც არ უნდა იყოს ის, გააგრძელებს რეფორმებს, რომლებიც საჭიროა საქართველოს ევროპულ გზაზე წინსვლისთვის.
ჰერჩინსკის თქმით, მოვლენათა გაუარესების შემთხვევაში, შეუძლიათ ინსტრუმენტების სხვადასხვა ელემენტის გამოყენება, რომელთა შორის ერთ-ერთია „ევროკავშირთან უვიზო რეჟიმის გაუქმება".
ივლისში ევროკავშირმა საქართველოს თავდაცვის გასაძლიერებლად გამოყოფილი 30 მილიონი ევროს ოდენობის დახმარება შეუჩერა.
მიმდინარე წლის სექტემბერში პრეზიდენტ ბაიდენის ადმინისტრაციამ გააუქმა მიღებაზე საქართველოს პრემიერ-მინისტრის, ირაკლი კობახიძის მოსაწვევი. გადაწყვეტილების მიზეზად დაასახელეს საქართველოს მთავრობის ანტიდემოკრატიული ქმედებები და აშშ-ის მიმართ უარყოფითი რიტორიკა.
Your browser doesn’t support HTML5
წყაროების ცნობით, ამერიკამ ბიძინა ივანიშვილის წინააღმდეგ სანქციების პაკეტი შეიმუშავა