ნატოს ლიდერი შეზღუდვების მოხსნაზე საუბრობს

იენს სტოლტენბერგი, ნატოს გენერალური მდივანი. პრაღა, ჩეხეთი. 30 მაისი, 2024 წ.

დღეს, 30 მაისს პრაღაში ნატოს ქვეყნების საგარეო მინისტრების არაფორმალური შეხვედრის წინ, ალიანსის გენერალურმა მდივანმა იენს სტოლტენბერგმა თქვა, რომ დროა ტრანსატლანტიკური ხელშეკრულების ორგანიზაციამ გადახედოს წესებს, თუ როგორ გამოიყენებს უკრაინა დასავლეთიდან მიწოდებულ იარაღს რუსეთის აგრესიის წინააღმდეგ საბრძოლველად.

ნატოს გენერალურმა მდივანმა აღნიშნა, რომ ინდივიდუალური ქვეყნების მიერ უკრაინისთვის მიწოდებული იარაღის გამოყენებაზე დაწესებული შეზღუდვები გადახედვას უნდა დაექვემდებაროს.

ბოლო კვირებში ოფიციალური კიევი აქტიურად მოუწოდებს ვაშინგტონსა და ევროპულ დედაქალაქებს, მოუხსნას მას ეს შეზღუდვები. თუმცა, არაერთ ქვეყანაში აზრი დაყოფილია იმაზე, თუ რამდენად უნდა მიეცეთ უკრაინელ სამხედროებს უფლება, თავს დაესხან სამიზნე ობიექტებს რუსეთის ტერიტორიაზე.