შეერთებულმა შტატებმა თავის მოქალაქეებს უთხრა, რომ უკრაინაში ომის და რუსული სამართალდამცავი ორგანოების მიერ დაუსაბუთებელი დაპატიმრების და დევნის რისკის გამო, რუსეთი დაუყოვნებლივ დატოვონ.
„რუსეთში მცხოვრებმა ან ვიზიტით მყოფმა აშშ-ის მოქალაქეებმა, ქვეყანა დაუყოვნებლად უნდა დატოვონ... უკანონო დაკავების რისკის გამო, დამატებითი სიფრთხილე უნდა გამოიჩინონ“, განაცხადა აშშ-ის საელჩომ მოსკოვში.
„რუსეთში ნუ გაემგზავრებით,“ ნათქვამია საელჩოს განცხადებაში.
ამერიკის დიპლომატიური მისიის თქმით, „რუსეთის უშიშროების სამსახურებმა აშშ-ის მოქალაქეები ცრუ ბრალდებებით დააკავეს, რუსეთში მყოფი აშშ-ის მოქალაქეები დაკავების და დევნის გამორჩეულ სამიზნედ აქციეს, სამართლიან და გამჭვირვალე მოპყრობაზე უარი უთხრეს და დამაჯერებელი მტკიცებულებების წარმოდგენის გარეშე, საიდუმლო სასამართლო მოსმენებით მსჯავრი დასდეს“.
ასევე ნახეთ: ამერიკელ ყოფილ საზღვაო ქვეითს რუსეთში 16-წლიანი პატიმრობა მიუსაჯეს„რუსეთის ხელისუფლებამ ადგილობრივი კანონები ამერიკელი რელიგიური მუშაკების წინააღმდეგ დაუსაბუთებლად გამოიყენა და რელიგიურ საქმიანობაში ჩართული აშშ-ის მოქალაქეების წინააღმდეგ საეჭვო კრიმინალური გამოძიებები წამოიწყო“, განაცხადა აშშ-ის საელჩომ.
კრემლი ამბობს, რომ ეს პირველი შემთხვევა არ არის, როდესაც აშშ-ის მოქალაქეებს რუსეთის დატოვება სთხოვეს. ბოლო ასეთი გაფრთხილება სექტემბერში გაჟღერდა, როდესაც პრეზიდენტმა პუტინმა ნაწილობრივი მობილიზაცია გამოაცხადა.
რუსეთის ფედერალური უშიშროების სამსახურმა (ეფ ეს ბე) განაცხადა, რომ იანვარში, პროკურორებმა აშშ-ის მოქალაქის წინააღმდეგ ჯაშუშობის ბრალდებით კრიმინალური საქმე წამოიწყეს.