საქართველოში ევროკავშირის წარმომადგენლობა აცხადებს, რომ ქვეყნაში მოქალაქეებს კვლავ ემუქრებათ ფუნდამენტური უფლებების სარგებლობის გამო დაკავება. საელჩოს მიერ გამოქვეყნებულ განცხადებაში, რომელსაც თან ერთვის სისხლის სამართლის წესით დაკავებული მედიასაშუალებების „ბათუმელებისა“ და „ნეტგაზეთის“ დირექტორისა და დამფუძნებლის ფოტო, წერია, რომ ყველა უკანონოდ დაკავებული უნდა გათავისუფლდეს.
„საქართველოს მოქალაქეებს კვლავ ემუქრება დაკავება ფუნდამენტური უფლებებით სარგებლობის გამო. მზია ამაღლობელისა და გურამ მურვანიძის [„ბათუმელების“ ოპერატორი, რომელიც ადმინისტრაციული წესით დააკავეს] დაპატიმრება გამოხატვის თავისუფლებას უფრო მეტად აკნინებს. ყველა უსამართლოდ დაკავებული უნდა გათავისუფლდეს. ევროკავშირი სამართლიანი სასამართლოს უფლების დაცვისკენ მოუწოდებს. დაუსჯელობა ვერ გაიმარჯვებს“, - აცხადებს ევროკავშირის წარმომადგენლობა.
მზია ამაღლობელი 11 იანვარს ბათუმში მიმდინარე აქციაზე პლაკატის გაკვრისთვის დააკავეს, მოგვიანებით კი გაათავისუფლეს. გათავისუფლებიდან რამდენიმე წუთში ის სისხლის სამართლის კოდექსით დააკავეს. მას ედავებიან ბათუმის პოლიციის უფროსისთვის, ირაკლი დგებუაძისთვის სილის გაწნას და ამისთვის პროკურატურა მისთვის ოთხიდან შვიდ წლამდე პატიმრობას ითხოვს.
შეერთებული შტატების „ჰელსინკის კომისიის“ თავმჯდომარე, რესპუბლიკელი ჯო უილსონი პლატფორმა "X"-ზე წერს, რომ „მზია ამაღლობელი და ივანიშვილის რეჟიმის ყველა პოლიტპატიმარი დაუყოვნებლივ უნდა გათავისუფლდნენ". კონგრესმენის თქმით, "უნდა ჩატარდეს თავისუფალი და სამართლიანი არჩევნები“.
მზია ამაღლობელის დაკავებას გამოეხმაურა Women Press Freedom-ი. ორგანიზაცია პლატფორმა "X"-ზე წერს, რომ ნოემბრის აქციების შემდეგ პოლიციის მხრიდან ათობით ჟურნალისტი ქალი შევიწროებისა და ძალადობის მსხვერპლი გახდა.
„ამაღლობელი და მისი კოლეგები აშუქებდნენ, როგორ უსამართლოდ აკავებდა [დემონსტრანტებს] ბათუმის პოლიცია. ვითხოვთ, მოეხსნათ ბრალი და შეწყდეს დამოუკიდებელი ჟურნალისტების დევნა საქართველოში“, - წერია განცხადებაში.
