უკრაინის უშიშროების ოფიცრებმა დააკავეს ორი ადამიანი, რომლებიც ეჭვმიტანილები არიან რუსეთის სახელით მოქმედებაში. უკრაინული მხარის თქმით, ისინი ცდილობდნენ აეფეთქებინათ სარკინიგზო ხაზი, რომელიც აღმოსავლეთში უკრაინული ჯარისთვის იარაღის მიწოდებისთვის გამოიყენებოდა.
დაკავებულებმა, რომლებიც იდენტიფიცირებულნი არიან მხოლოდ კიევისა და ხარკოვის რეგიონების მაცხოვრებლებად, ასაფეთქებელი მოწყობილობა მოათავსეს ცენტრალურ პოლტავას რაიონში და დაგეგმეს მისი დისტანციურად აფეთქება, მაგრამ ისინი უშიშროების თანამშრომლებმა დააკავეს,- ნათქვამია განცხადებაში, რომელიც უკრაინის უშიშროების უწყებამ გაავრცელა.
მომხდართან დაკავშირებით რუსეთს კომენტარი ჯერ არ გაუკეთებია.
„ოკუპანტები იმედოვნებდნენ, რომ დააზიანებდნენ უკრაინის შეიარაღებული ძალებისთვის იარაღის, საბრძოლო მასალისა და საწვავის ლოგისტიკურ მარშრუტებს“, - ამბობენ უკრაინის ხელისუფლებაში.
დაკავებულებს ტელეფონები ჩამოართვეს და დაადგინეს, რომ ისინი რუსეთის მთავარი შიდა სადაზვერვო სააგენტოს, უსაფრთხოების ფედერალური სამსახურის (FSB) ოფიცრისგან იღებდნენ ბრძანებებს.
გავრცელებული ინფორმაციით, გამიზნული იყო, რომ ბომბი 21-22 მარტს, რუსეთის საჰაერო თავდასხმების დროს უნდა აფეთქებულიყო.
