ამერიკელებს კიდევ ერთხელ მოუწოდებენ, რომ საშობაოდ არ იმოგზაურონ, ვინაიდან კორონავირუსის პანდემიის გამო ქვეყანაში უკიდურესად მწვავე სიტუაციაა. ადგილობრივი მთავრობების წარმომადგენლები კი შეზღუდვებს აწესებენ იმ იმედით, რომ ვირუსის გავრცელება თავიდან აიცილონ.
ბრიტანეთში, კორონავირუსის ახალი შტამის აღმოჩენის შემდეგ, შიში და დაძაბულობა კორონავირუსთან დაკავშირებით, ამერიკაში, კიდევ უფრო გამძაფრდა. ამერიკის ოფიციალური პირები განიხილავენ ბრიტანეთთან სამოგზაურო აკრძალვების შემოღების საკითხსაც.
ამერიკის დაავადებათა კონტროლისა და პრევენციის ცენტის განცხადებით, ქვეყანაში, კორონავირუსის ახალი შტამი არ გავრცელებულა.
შეერთებულ შტატებში, კორონავირუსის, 18 მილიონზე მეტი დადასტურებული შემთხვევაა. მათ შორის, ქვეყანაში, ბოლო 6 დღის განმავლობაში მილიონზე მეტი ადამიანი დაინფიცირდა.
განსაკუთრებით მძიმეა სიტუაცია რამდენიმე შტატში, მათ შორის კალიფორნიაშიც. შტატის საავადმყოფოებში აცხადებენ, რომ არ ჰყავთ საკმარისი ექიმები და ექთნები იმისთვის, რომ პაციენტებს უმკურნალონ, ზოგიერთ საავადმყოფოს კი ინტენსიურ თერაპიის განყოფილებაში საწოლები არ ჰყოფნის.
ამერიკის ქალაქების უმეტესობაში, კორონავირუსის გამო, შეზღუდვები განახლდა. სიტუაცია განსაკუთრებით გამწვავდა მადლიერების დღის შემდეგ, მას შემდეგ რაც მილიონობით ამერიკელმა, ჯანდაცვის ექსპერტების მოწოდების მიუხედავად საკუთარი ოჯახების მონახულება და მოგზაურობა მაინც გადაწყვიტა.
Facebook Forum