რამდენიმე დღის წინ აზერბაიჯანის სასამართლომ 16 წლით თავისუფლების აღკვეთა მიუსაჯა აზერბაიჯანელ ჟურნალისტს ფოლად ასლანოვს. მისი მეუღლე კი ამბობს, რომ განაჩენი პოლიტიკურადაა მოტივირებული და მისი ჟურნალისტი მეუღლის საქმიანობას უკავშირდება.
ასლანოვს სამშობლოს ღალატისთვის გამოუტანეს აღნიშნული განაჩენი. იგი პორტალ "ხაბერმანის" დამფუძნებელი და მთავარი რედაქტორია და ადგილობრივ, თუ საერთაშორისო მოვლენებს აშუქებს, მათ შორის - მთავრობაში არსებულ კორუფციის ბრალდებებს.
გულმირა ასლანოვამ "ამერიკის ხმას" უთხრა, რომ სასჯელი უსამართლოა, რომ ის გასაჩივრებას აპირებს და არ ენდობა სასამართლო პროცესის კანონიერებას.
გამოძიება ფოლადის საქმეში 17 თვე გრძელდებოდა და ჟურნალისტის მეუღლის მტკიცებით, ერთი ფაქტიც კი ვერ აღმოაჩინეს ასლანოვის ბრალეულობის დასამტკიცებლად. ქალბატონი გულმირა ამიტომაც პოლიტიკურ მოტივაციაზე საუბრობს, რომელსაც ის პირდაპირ აკავშირებს მეუღლის ჟურნალისტურ საქმიანობასთან.
აზერბაიჯანის სახელმწიფო უსაფრთხოების სამსახურმა ფოლადი, მეუღლესთან და შვილთან ერთად, 2019 წელს ირანში გადასვლის მომენტში დააკავა. ირანში წყვილი ქორწილის გადახდას გეგმავდა.
ჟურნალისტის მეუღლე და ქალიშვილი გაათავისუფლეს, თუმცა ირანის ინფორმაციით, ფოლადს ბრალად დასდეს უცხო ქვეყნისთვის აზერბაიჯანის "სახელმწიფო უსართხოების და თავდაცვის შესაძლებლობების შემცველი ინფორმაციის გადაცემა, სასამართლო დოკუმენტაციის ჩათვლით."
მეუღლის ინფორმაციით, "საქმეზე გამოკითხულმა ვერცერთმა 18-მა მოწმემ ვერ დაასაბუთა, რომ ფოლადი ჯაშუში იყო, ან მოღალატე."
შიმშილობა
ევროსაბჭოს ჟურნალისტთა უსაფრთხოების პლატფორმის მონაცემებით, წელს, აგვისტოში, ფოლადმა შიმშილობა დაიწყო მისი დაკავების გასაპროტესტებლად. თავად ჟურნალისტი თვლის, რომ დაპატიმრება დაკავშირებულია მის საქმიანობასთან, კრიტიკულად გამოიძიოს და გააშუქოს სახელმწიფო უსაფრთხოების სამსახურში არსებული კორუფციის შემთხვევები.
ჟურნალისტთა დაცვის კომიტეტმა კი განაცხადა, რომ აზერბაიჯანის მთავრობამ დაუყოვნებლივ უნდა გაათავისუფლოს ასლანოვი და ხელი არ შეუშალოს აპელაციის განხილვას. ამავე ორგანიზაციის ევროპის და ცენტრალური აზიის პროგრამის კოორდინატორმა კი დაამატა, რომ "მორიგი დაკავებით ბაქო ამტკიცებს, რომ მართლაც ყველაზე წამყვანი დამპატიმრებელია ევრაზიის რეგიონში."
"შემაშფოთებელი" დაჭერები
ჟურნალისტთა დაცვის კომიტეტის ბოლო ანგარიშში ციხეებში მყოფ ჟურნალისტებზე, ნათქვამია, რომ 2019 წელს აზერბაიჯანში, სულ ცოტა 6 ჟურნალისტი იყო დატყვევებული.
ეუთოს პოლიტიკური მრჩეველი ასლანოვის და ოპოზიციური პარტიების წევრების დაკავებას "შემაშფოთებელს" უწოდებს. ის აზერბაიჯანის მთავრობას მათი გათავისუფლებისკენ მოუწოდებს.
ჟურნალისტთა გახშირებული დაკავებები კი ზოგადად პრესის თავისუფლების მხრივ მდგომარეობას ძალიან ართულებს აზერბაიჯანში.
აზერბაიჯანი 180-დან 168-ე ადგილს იკავებს ორგანიზაციის "ჟურნალისტები საზღვრებს გარეშე" ანგარიშში.
მასალა მოამზადა "ამერიკის ხმის" აზერბაიჯანულმა განყოფილებამ ვაშინგტონში.
Facebook Forum