საქართველოში ვიზიტით მყოფი ევროპისა და ევრაზიის საკითხებში ამერიკის შეერთებული შტატების სახელმწიფო მდივნის თანაშემწე ჯიმ ო'ბრაიენი პრეზიდენტ სალომე ზურაბიშვილს შეხვდა.
საქართველოს პრეზიდენტის ადმინისტრაციის ცნობით, პირისპირ შეხვედრა დათქმულ დროზე მეტხანს, საათ-ნახევარს გაგრძელდა. საათნახევრიანი პირისპირ შეხვედრის გამო, გაუქმდა პრეზიდენტისა და ამერიკის სახელმწიფო მდივნის თანაშემწის გაფართოებულ ფორმატში, დელეგაციების თანხლებით დაგეგმილი შეხვედრა. საუბრის შინაარსი საჯარო არ არის.
ჯიმ ო'ბრაიენმა, საქართველოში ვიზიტისას პირველი შეხვედრა საქართველოს პრემიერ-მინისტრთან, ირაკლი კობახიძესთან გამართა. ჯიმ ო'ბრაიენი მთავრობის ადმინისტრაციაში 14 მაისს, დღის 12:00 საათისთვის მივიდა და შენობა 15:00-ის წუთებზე დატოვა.
მთავრობის ადმინისტრაციაში გამართულ ამ შეხვედრას აშშ-ის ელჩი საქართველოში რობინ დანიგანიც ესწრებოდა.
ვიზიტის ფარგლებში ჯიმ ო'ბრაიენი ასევე შევხდა არასამთავრობო ორგანიზაციების, მედიისა და ბიზნესის წარმომადგენლებს, ოპოზიციონერ პოლიტიკოსებს.
დაგეგმილი იყო შეხვედრა „ქართული ოცნების“ საპატიო თავმჯდომარესთან, ბიძინა ივანიშვილთანაც. პრემიერ-მინისტრმა ირაკლი კობახიძემ 13 მაისს მთავრობის ადმინისტრაციაში გამართულ პრესკონფერენციაზე თქვა, რომ ბიძინა ივანიშვილმა ჯიმ ო'ბრაიენს შეხვედრაზე უარი უთხრა.
