ირანის პირველ ბირთვულ ელექტრო სადგურში ინჟინრებმა დღეს ბირთვული საწვავი ჩატვირთეს. რეაქტორი ქალაქ ბუშერთან მდებარეობს.
ირანის სახელმწიფო ტელევიზიამ დღეს გაავრცელა რეაქტორის გახსნის ცერემონიალის კადრები. ტელე რეპორტაჟში თეთრ ხალათებში ჩაცმული რუსი და ირანელი ოფიციალური პირები რეაქტორის დათვალიერების დროს იყვნენ ასახული.
ირანს ბირთვული რეაქტორის აშენებაში რუსეთი დაეხმარა და ბრირთვული საწვავიც ირანში სწორედ რუსეთიდან ჩააქვთ.
რეაქტორის გახსნის ცერემონიალის შემდეგ გამართულ პრეს-კონფერენციაზე, ირანის ბირთვული პროგრამის უფროსმა ალი აქბარ სალეჰიმ რუსეთის ხელისუფლებას მადლობა გადაუხადა აქამდე გაწეული დახმარებისთვის და აღნიშნა, რომ მიუხედავად დასავლეთის ქვეყნების მიერ დაწესებული ახალი სანქციებისა, ირანი მშვიდობიანი ბირთვული პროგრამის "მსოფლიოში უდიდეს სიმბოლოდ" იქცევა.
