მკვლევარები იტყობინებიან, რომ ებოლის ექსპერიმენტული ვაქცინა დაავადების პრევენციის საქმეში მაღალ ეფექტურობას აჩვენებს. ჯანდაცვის მსოფლიო ორგანიზაციის მიერ დღეს გაკეთებული განცხადებით, ვაქცინა ჯერჯერობით 100-პროცენტიანი ეფექტურობის გარანტიას იძლევა. პირველადი შედეგები იმდენად იმედისმომცემია, რომ მისი კლინიკური გამოცდაც კი შეწყდა, რათა რისკის ქვეშ მყოფი ყველა ადამიანის აცრა დაუყოვნებლივ დაიწყოს - აცხადებს გაეროს ჯანდაცვის სააგენტო.
ებოლის ვაქცინა გვინეაში გამოსცადეს. პირველადი შედეგების და ანალიზის გაცნობა ბრიტანულ სამედიცინო გამოცემა „ლანცეტშია“ შესაძლებელი. ვაქცინის, სახელწოდებით VSV-EBOV, ექსპერიმენტული გამოყენება მარტის დასაწყისში დაიწყო. კლინიკურ გამოცდაში 4 ათასზე მეტი ადამიანი მონაწილეობდა. ებოლის ბოლო პანდემიამ, რომელმაც დასავლეთ აფრიკაში იფეთქა, 11 ათასზე მეტი ადამიანი შეიწირა. მათი უმრავლესობა ლიბერიის, გვინეის და სიერა ლეონეს მოქალაქეები იყვნენ.