ტრამპი შოტლანდიაში გოლფის კორტების მოსანახულებლად ჩავიდა

1 მაისს ამერიკის ყოფილი პრეზიდენტი დონალდ ტრამპი შოტლანდიის საპორტო ქალაქ აბერდინში ჩავიდა. ის მოკლე ხანს დაჰყოფს შოტლანდიაში, სადაც ორ გოლფის კორტს ფლობს. შეერთებულ შტატებში დაბრუნებამდე ტრამპი ირლანდიასაც მოინახულებს.

ამერიკის ყოფილი პრეზიდენტი, რომელიც 2024 წლის საპრეზიდენტო არჩევნებში ისევ ჩაერთო, ამბობს, რომ შოტლანდიაში და ირლანდიაში მდებარე, თავისი ქონების "დასახედად და შესამოწმებლად" ჩავიდა. "დიდებულია შინ ყოფნა" - უთხრა ტრამპმა აბერდინის აეროპორტში შეკრებილ ჟურნალისტებს, "ეს დედაჩემის სამშობლო იყო".

"მე შევხვდები ბევრ ბრწყინვალე მეგობარს, გავხსნი ახალ და მომაჯადოებელ მეორე კორტს აბერდინში. ძალიან აღფრთოვანებული ვარ" - დაწერა ტრამპმა საკუთარი სოციალური ქსელის პლატფორმაზე Truth Social. თებერვალში გამოქვეყნებული ანგარიშების მიხედვით, ორ შოტლანდიურ კორტზე მისმა ქონებამ 2021 წელს $5.5 მილიონით იზარალა.

რიგითმა ირლანდიელებმა ჯო ბაიდენს გულთბილი შეხვედრა მოუწყვეს. "არაჩვეულებრივი გრძნობაა, თითქოს შინ ჩამოვედი" - უთხრა ამერიკის პრეზიდენტმა ჟურნალისტებს, მას შემდეგ, რაც კარლინგფორდის სასახლე დაათვალიერა. ამ ადგილიდან მოდის მისი ირლანდიელი წინაპრების ერთ-ერთი შტო.