ბელგიის პრემიერ-მინისტრმა ალექსანდრე დე კრომ პარასკევს განაცხადა, რომ მიმდინარეობს გამოძიება ივნისში დაგეგმილ ვროპულ არჩევნებში, რუსეთის სავარაუდო ჩარევის შესახებ. მისი თქმით, ბელგიის დაზვერვის სამსახურმა დაადასტურა ქსელის არსებობა, რომელიც ცდილობს, ძირი გამოუთხაროს უკრაინის მხარდაჭერას.
„ბელგიის სადაზვერვო სამსახურებმა დაადასტურეს პრორუსული ქსელების ჩარევის მცდელობა ევროპის რამდენიმე ქვეყანაში და ასევე აქ, ბელგიაში“, - თქვა დე კრომ, რომლის ქვეყანა ამჟამად ევროკავშირის როტაციული თავმჯდომარეც არის.
დე კრომ თქმით, ბელგიური სააგენტოები მჭიდროდ თანამშრომლობენ ჩეხეთის ხელისუფლებასთან მას შემდეგ, რაც იქ პრორუსული გავლენის ოპერაცია გამოიკვეთა. გამოძიებამ აჩვენა, რომ გარკვეულმა პირებმა ევროპარლამენტის წევრებს მიმართეს და ფული შესთავაზეს, რუსული პროპაგანდის ხელშეწყობისთვის.
„ჩვენი დაზვერვის სამსახურის ცნობით, მოსკოვის მიზნები ძალიან ნათელია - დაეხმაროს ევროპარლამენტში მეტი პრორუსი კანდიდატის არჩევას და ამ ინსტიტუტში გარკვეული პრორუსული ნარატივის განმტკიცებას“, - განუცხადა მან ჟურნალისტებს.
დე კრომ თქვა, რომ „მიზანი ძალიან ნათელია: დასუსტებული ევროპული მხარდაჭერა უკრაინისადმი ემსახურება ბრძოლის ველზე რუსეთის დახმარებას და ეს არის რეალური მიზანი იმისა, რაც გამოვლინდა ბოლო კვირებში“.
ევროკავშირის ქვეყნებმა მილიარდობით ევროს ფულადი დახმარება გადასცეს უკრაინას. გარდა ამისა, პრეზიდენტ ზელენსკის მთავრობას ევროპული ქვყენებისგან მნიშვნელოვანი რაოდენობით იარაღი და საბრძოლო მასალა მიეწოდება. ეროკავშირის ქვეყნებმა, უკრაინაში ომის დაწყებისთანავე სანქციები დაუწესეს რუსეთის მაღალჩინოსნებს, რუსულ ბანკებს, კომპანიებსა და ენერგეტიკულ სექტორს.
