ფარმაცევტული კომპანიები კოვიდ-19-ის ახალ სამკურნალო და პრევენციულ საშუალებებზე მუშაობას აგრძელებენ. წარმატება ამ მიმართულებით კრიტიკულად მნიშვნელოვანია ჯანმრთელობის სხვადასხვა პრობლემების მქონე ისეთი ადამიანებისთვის, ვისთვისაც ვაქცინაცია რეკომენდებული არ არის. მათთვის მეცნიერები ალტერნატიულ გზებს ეძებენ.
სამშაბათს ბრიტანულ-შვედურმა ფარმაცევტულმა კომპანიამ "ასტრაზენეკა" განაცხადა, რომ მათ მიერ შემუშავებულმა მონოკლონური ანტისხეულების კოქტეილმა, რომელიც კლინიკური გამოცდის დასკვნით ფაზაზე იყო, ექსპერიმენტში მონაწილეთა შორის გაუმჯობესება არ აჩვენა. კოქტეილში ორი ტიპის ანტისხეულები იყო გამოყენებული და მათ ზრდასრულ ადამიანებზე ცდიდნენ.
კლინიკური გამოცდის მესამე ფაზისთვის ისეთი ადამიანები შეარჩიეს, ვისაც ბოლო 8 დღის განმავლობაში ჰქონდა კონტაქტი კორონავირუსით ინფიცირებულთან. ამასთან, საწყის ეტაპზე მათ ტესტზე უარყოფითი პასუხი უნდა ჰქონოდათ. ექსპერიმენტში ამერიკიდან და ბრიტანეთიდან 1 121 ადამიანი მონაწილეობდა.
მეცნიერებს აინტერესებდათ, შეძლებდა თუ არა ანტისხეულების კოქტეილი მათში სიმპტომების გამოჩენის პრევენციას. თერაპია მეორე ჯგუფთან შედარებით, რომელიც პლაცებოს იღებდა, ეფექტური მხოლოდ მონაწილეთა 33%-ში აღმოჩნდა. ამგვარი შედეგი სტატისტიკურად უმნიშვნელოდ ითვლება და ეს შეიძლება უბრალო დამთხვევა იყოს და არა თერაპიის შედეგი.
თუმცა, "ასტრაზენეკაში" შემუშავებულ მონოკლონური ანტისხეულების კოქტეილზე, სახელად AZD7442, ჯერ ხელი ბოლომდე არ ჩაუქნევიათ. პარალელურად გრძელდება 5 დამატებითი კლინიკური გამოცდა, რომლებშიც პრეპარატის ეფექტურობა და უსაფრთხოება მოწმდება როგორც პრევენციის, ისე მკურნალობის მიმართულებით.
შეერთებული შტატების მარეგულირებმა არაჰოსპიტალიზებული პაციენტების მკურნალობისთვის ორი მსგავსი პრეპარატი დაამტკიცა. ისინი "ასტრაზენეკას" კონკურენტი კომპანიების მიერაა შექმნილი, "რეგენერონში" და "ელი ლილიში". "რეგენერონი" ევროპის მარეგულირებელმაც დაამტკიცა და ახლა განიხილავს 2 სხვა კომპანიის მიერ შექმნილ ანტისხეულების კოქტეილს.
Facebook Forum