საქართველოს პრეზიდენტის, სალომე ზურაბიშვილის შეფასებით, დღეს ქვეყანა არის იმ "ძალიან სახიფათო" მდგომარეობაში, სადაც "დანა ჩაარტყეს კონსტიტუციაში". ამით, იგი ორბელიანების სასახლეში გამართულ ბრიფინგზე, საკონსტიტუციო სასამართლოს მხრიდან არჩევნებზე სარჩელების წარმოებაში არმიღებას გამოეხმაურა.
პრეზიდენტმა ბრიფინგი საკონსტიტუციო სარჩელის ავტორ პოლიტიკოსებთან და კონტიტუციონალისტებთან ერთად ჩაატარა.
"დღეს საკონსტიტუციო სასამართლომ განაჩენი გამოუტანა თავის თავს და ქვეყანას, ქვეყნის ყველა ინსტიტუტს, რამეთუ ის შანსი, რაც არსებობდა, რომ დავბრუნებულიყავით სწორედ საკონსტიტუციოს გადაწყვეტილებით, საკონსტიტუციო ჩარჩოში და იმ სიტუაციაში, სადაც ვიყავით არჩევნებამდე, რომელიც საწყისია ამ არალეგიტიმური, ერთიმეორეზე გადაბმული მოვლენებისა...", - თქვა სალომე ზურაბიშვილმა ბრიფინგზე.
მანვე განმარტა, თუ რატომ შეიტანეს სარჩელი საკონსტიტუციო სასამართლოში, "როცა უკვე ვიცოდით რა დღეში იყო მთელი სისტემა?" პრეზიდენტის სიტყვებით, ამაზე თავად უნდა "აგოს პასუხი", რადგან ეს სწორედ მისი გადაწყვეტილება იყო.
"იმედი თუ ნდობა იმისი, რომ საკონსტიტუციო მიიღებდა სწორ გადაწყვეტილებას, იყო მცირე, მაგრამ ყოველთვის არსებობს ჩემთვის, პირველ რიგში ადამიანების იმედი, მითუმეტეს ამ ქვეყანაში, სადაც არაერთხელ გამოაჩინეს ადამიანებმა ის ძალა, რითაც შეიძლება გადაუდგე მოვლენებს და დადგე, როგორც პიროვნება".
"შევცდი და დღეს ვართ იმ ძალიან სახიფათო მდგომარეობაში, როცა ქვეყანას აღარ გააჩნია კონსტიტუციური ძალაუფლება, სადაც დანა ჩაარტყეს კონსტიტუციაში და დახიეს მთლიანად. რჩება რა? ერთი კონსტიტუციური ლეგიტიმური ინსტიტუტი და ეს მე ვარ. ესაა ძალიან დიდი პასუხისმგებლობა და რჩება მეორე მხარეს ერთი ადამიანი, რომელმაც მოახდინა ძალაუფლების სრული უზურპაცია, დააწესა ძალადობრივი რეჟიმი - ესაა [ბიძინა] ივანიშვილი. ჩვენ უნდა მოვნახოთ გამოსავალი ამ ქვეყანაში. მისი პასუხისმგებლობაა დააბრუნოს მისი რეჟიმი არაძალადობრივ მდგომარეობაში, ხალხს მოუსმინოს, ჩემი პასუხისმგებლობაა, წავიყვანო ეს ქვეყანა ახალ არჩევნებამდე, რომელიც ლეგიტიმურად აირჩევს თავის ხვალინდელ ხელისუფლებას", - განაცხადა სალომე ზურაბიშვილმა.
3 დეკემბერს ცნობილი გახდა, რომ საქართველოს საკონსტიტუციო სასამართლომ წარმოებაში არ მიიღო პრეზიდენტისა და პოლიტიკური პარტიების სარჩელები 26 ოქტომბრის არჩევნების არაკონსტიტუციურად ცნობაზე. 9-კაციანი პლენუმის გადაწყვეტილებას არ დაეთანხმა და განსხვავებული აზრი დაწერა ორმა მოსამართლემ: თეიმურაზ ტუღუშმა და გიორგი კვერენჩხილაძემ. მათი დასაბუთება ჯერ არ არის ატვირთული სასამართლოს ვებსაიტზე.
გადაწყვეტილება საკონსტიტუციო სასამართლოს ვებსაიტზე დღეს, 3 დეკემბერს, გამოქვეყნდა. პლენუმმა გადაწყვეტილება 29 ნოემბერს მიიღო.
საკონსტიტუციო სასამართლოს საქართველოს პრეზიდენტმა სარჩელით 19 ნოემბერს მიმართა და არჩევნების არაკონსტიტუციურად ცნობა მოითხოვა ფარულობის, საყოველთაობისა და თავისუფალი არჩევნების ჩატარების უფლებების დარღვევის გამო.
პრეზიდენტი თავის სარჩელში აცხადებს, რომ 26 ოქტომბრის არჩევნებზე ორი კონსტიტუციური პრინციპი დაირღვა:
- ხმის მიცემის ფარულობა – პრეზიდენტი იზიარებს ფართოდ გავრცელებულ შეშფოთებას იმის შესახებ, რომ ბიულეტენის უკანა მხრიდან მელნის გაჟონვამ ცხადყო, რომელ პარტიას მისცა ამომრჩეველმა ხმა;
- ხმის მიცემის საყოველთაობა – პრეზიდენტი ამტკიცებს, რომ საზღვარგარეთ მცხოვრები ქართველების ხმის მიცემის უფლება სახელმწიფომ უგულებელყო იმით, რომ არ უზრუნველყო მათ მიერ ხმის მიცემის უფლების გამოყენება.
იდენტური სარჩელი მოამზადეს პოლიტიკური პარტიების წარმომადგენლებმაც და საკონსტიტუციო სასამართლოს მიმართეს. სასამართლომ ორივე სარჩელი გაერთიანებულად განიხილა.
