ამერიკის სახელმწიფო მდივანი ისრაელში ვიზიტს საჰაერო იერიშების ფონზე აგრძელებს. საინფრომაციო სააგენტო „როიტერის“ ინფორმაციით, მაშინ, როცა ენტონი ბლინკენი ისრაელის პრემიერ-მინისტრს, ბენიამინ ნეთანიაჰუს ხვდებოდა, საჰაერო განგაშის სიგნალი ჩაირთო, რის გამოც ბლინკენი და ნეთანიაჰუ უსაფრთხო ადგილზე გადაიყვანეს.
ენტონი ბლინკენი და პრემიერი ნეთანიაჰუ, ბუნკერში 5 წუთის განმავლობაში იმყოფებოდნენ. ინფორმაციას ადასტურებს ამერიკის სახელმწიფო დეპარტამენტის პრესსპიკერი, მეთიუ მილერი.
არსებული ინფორმაციით შემთხვევა მაშინ მოხდა, როცა ამერიკის სახელმწიფო მდივანი და ისრაელის პრემიერ-მინისტრი ერთმანეთს თავდაცვის სამინისტროში ხვდებოდნენ.
„ეს იქნება ხანგრძლივი ომი.. მაგრამ, ჩვენ ვაპირებთ გავიმარჯვოთ ისრაელისა და ებრაელი ხალხისთვის და იმ ღირებულებებისთვის, რომლისაც ორივე ქვეყანას სწამს“,- თქვა მოგვიანებით ისრაელის თავდაცვის მინისტრმა, იოავ გლანტმა, ჟურნალისტებთან საუბრის დროს.
თელ-ავივზე საჰაერო იერიშები ბოლო რამდენიმე საათის განმავლობაში გახშირდა და ამას საერთაშორისო მედიის ჟურნალისტებიც ადასტურებენ. „ფოქს ნიუსის“ ჟურნალისტმა, რომელიც თელ-ავივიდან აშუქებს მიმდინარე პროცესებს თქვა, რომ ბოლო რამდენიმე საათის განმავლობაში, იერიშის 10-ზე მეტი მცდელობა იყო. ამავე ინფორმაციას ავრცელებს ტელეკომპანია „სი-ენ-ენი“.
ამერიკის სახელმწიფო მდივანი ისრაელში ორშაბათს დაბრუნდა, ენტონი ბლინკენი ცდილობს, თავიდან აიცილოს ისრაელის ჰამასთან ომის რეგიონულ კონფლიქტში გადასვლა და ასევე მოხდეს ჰუმანიტარული დერეფნის შემუშავება იმ პირთათვის, რომლებიც ღაზის სექტორში იმყოფებიან.
Facebook Forum