რუსეთის მიერ მოლდოვის საჰაერო სივრცის დარღვევის გამო, კიშინიოვში რუსეთის ელჩი ახსნა-განმარტებებისთვის დაიბარეს. მოლდოვა აცხადებს, რომ 10 ოქტომბერს რუსეთის სამმა ფრთოსანმა რაკეტამ ქვეყნის საჰაერო სივრე გადაკვეთა. მათი სამიზნე უკრაინა იყო.
"ამ დილით, შავ ზღვაში მყოფი რუსული გემებიდან უკრაინაზე დამიზნებულმა 3-მა ფრთოსანმა რაკეტამ მოლდოვის საჰაერო სივრცე გადაკვეთა. მე განკარგულება გავეცი, ახსნა-განმარტებისთვის რუსეთის ელჩი დაიბარონ", - დაწერა ამ დილით სოციალურ ქსელ "ტვიტერში" მოლდოვის საგარეო საქმეთა მინისტრმა, ნიკუ პოპესკუმ.
Three cruise missiles launched on Ukraine this morning from Russian ships in the Black Sea crossed Moldova%27s airspace. I instructed that Russia%27s ambassador be summoned to provide an explanation.
— Nicu Popescu (@nicupopescu) October 10, 2022
პოპესკუს თქმით, მოლდოვა "უმკაცრესად" გმობს საკუთარი საჰაერო სივრცის დარღვევის ფაქტს და ასევე "რუსეთის მიმდინარე აგრესიას უკრაინის წინააღმდეგ".
რუსეთმა ორშაბათს უკრაინის ქალაქებზე შეტევა განაახლა. სარაკეტო იერიში ბოლო 24 საათის განმავლობაში მიიტანეს როგორც ქვეყნის დედაქალაქ კიევზე, ისე - უკრაინის რამდენიმე სხვა ქალაქზე. უკრაინის თავდაცვის სამინისტროს ცნობით, რუსეთმა 10 ოქტომბერს უკრაინას 75 რაკეტა ესროლა, რომელთაგან მათ 41-ის განეიტრალება შეძლეს.