ისრაელის პრემიერ-მინისტრი ბენიამინ ნეთანიაჰუ დღეს დილით პოლიციამ დაკითხა. გამოძიება მის კორუფციულ გარიგებაში მონაწილეობის ბრალდებებს ეხება.
როცა პოლიცია ნეთანიაჰუს სახლთან მივიდა, იქ პრემიერ-მინისტრის წინააღმდეგ უკვე დემონსტრაცია მიმდინარეობდა. საპროტესტო მიტინგზე მიტანილ ბანერებზე ეწერა - "კრიმინალ-მინისტრი".
გამოძიებაში ფიგურირებს ტელეკომუნიკაციების კომპანია. ნეთანიაჰუმ კომპანიისთვის მომგებიანი რეგულაციები გამოსცა. არსებობს ეჭვი, რომ სანაცვლოდ, პრემიერ-მინისტრი მედიაში მისთვის სასარგებლო გაშუქებას ითხოვდა.
ამას გარდა, პოლიცია ნეთანიაჰუს კიდევ ორ საქმეზე დაკითხავს. ორივე საქმე მის სავარაუდო კორუმპირებულ საქმიანობასთან დაკავშირებით აღიძრა.
პრემიერ-მინისტრი ბრალდებებს უარყოფს. ბენიამინ ნეთანიაჰუს თქმით, ეს ყოველივე სხვა არაფერია, თუ არა მედიის მიერ მის წინააღმდეგ დაწყებული "კუდიანებზე ნადირობა".