შინაგან საქმეთა სამინისტრო თბილისში მიმდინარე აქციების მონაწილეებს მიმართავს და მოუწოდებს, არ გასცდნენ შეკრების და გამოხატვის თავისუფლების კანონით დასაშვებ ფარგლებს.
შინაგან საქმეთა სამინისტრო განცხადებას ავრცელებს, რომელშიც უწყება განმარტავს, რომ აქციების მონაწილეთა მხრიდან კანონის დარღვევის ფაქტებზე სამინისტრო შესაბამის რეაგირებას მოახდენს.
„როგორც საზოგადოებისთვის ცნობილია, რუსთაველის გამზირზე მიმდინარეობს აქცია. პარალელურად, 19:00 საათზე აქცია დაიგეგმა პუშკინის სკვერში.
შინაგან საქმეთა სამინისტროს მოვალეობაა, უზრუნველყოს საზოგადოებრივი წესრიგის და უსაფრთხოების დაცვა აქციების მიმდინარეობის თითოეულ ადგილზე. აქციების მონაწილეთა მხრიდან კანონის დარღვევის ფაქტებზე სამინისტრო შესაბამის რეაგირებას მოახდენს. მოვუწოდებთ აქციის მონაწილეებს, არ გასცდნენ შეკრების და გამოხატვის თავისუფლების კანონით დასაშვებ ფარგლებს. ამასთან, ვაფრთხილებთ ორივე აქციის ორგანიზატორებს, არ დაუშვან ძალადობისკენ მოწოდებები და უზრუნველყონ, რომ აქციებმა არ მიიღოს ძალადობრივი ხასიათი.
როგორც ერთი, ისე მეორე აქციის მონაწილეთა მხრიდან სამართალდარღვევის ნებისმიერი ფაქტი პოლიციის მიერ დაუყოვნებლივ იქნება აღკვეთილი“, - ნათქვამია შსს-ის განცხადებაში.
პარლამენტის წინ დილიდან არიან შეკრებილნი ჰომოფობიურად განწყობილი ჯგუფები, სასულიერო პირები და მათი თანამოაზრეები. მათ დაკავებული აქვთ ის ტერიტორია, სადაც 18 დღეა მიმდინარეობს ანტისაოკუპაციო აქციები.
სასულიერო პირები მოითხოვენ ტერიტორიის "საშინელი ადამიანებისგან" გასუფთავებას, რათა შეძლონ პარაკლისის გადახდა.
ანტისაოკუპაციო აქციის მონაწილეები დღეს საღამო კვლავ გეგმავენ შეკრებას და აქციის გამართვას სახელწოდებით "სირცხვილია 19.0".
ანტისაოკუპციო აქციები თბილისში 20 ივნისიდან მიმდინარეობს. აქციის მონაწილეთა მოთხოვნაა შს მინისტრის, გიორგი გახარიას გადადგომა.
სტატია გამოქვეყნდა რადიო თავისუფლების ვებ გვერდზე.